ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ

Օ Ր Ե Ն Ք Ը

Օրինագիծն ընդունված է ՀՀ Գերագույն
խորհրդի կողմից 27 մարտի 1995 թ. Հ.Ն-1141-I

Հոդված 1

Հայաստանի Հանրապետության նորընտիր Գերագույն խորհուրդը վերանվանել Հայաստանի Հանրապետության Ազգային ժողով:

Հոդված 2

Հայաստանի Հանրապետության Սահմանադրությունը ընդունվում է Գերագույն խորհրդի կամ Հայաստանի Հանրապետության հանրաքվեի միջոցով` Գերագույն խորհրդի հավանությամբ:

Հոդված 3

Ազգային ժողովի լիազորությունների ժամկետը չորս տարի է:

Հոդված 4

Պատգամավոր չեն կարող լինել կառավարության անդամները: Պատգամավոր չեն կարող լինել և պատգամավորական թեկնածու չեն կարող առաջադրվել դատավորները, դատախազության, ազգային անվտանգության պետական վարչության աշխատակիցները, ներքին գործերում և զինված ուժերում ծառայողները:

Հոդված 5

Ազգային ժողովը կազմված է 190 պատգամավորից, որից 150-ը ընտրվում է մեծամասնական ընտրակարգով` միամանդատ ընտրատարածքներից, իսկ 40-ը` համամասնական ընտրակարգով` հանրապետության ողջ տարածքն ընդգրկող մեկ ընտրատարածքից:

Ընտրությունների ժամանակ յուրաքանչյուր ընտրող ունի մեկ ձայնի իրավունք` մեծամասնական միամանդատ ընտրատարածքում և մեկ ձայնի իրավունք` համամասնական ընտրատարածքում:

Հոդված 6

Պատգամավորության թեկնածուներ առաջադրելու իրավունքը պատկանում է ընտրական իրավունք ունեցող քաղաքացիներին, հասարակական-քաղաքական կազմակերպություններին կամ նրանց միավորումներին:

Հոդված 7

Ընտրություններն անցկացվում են սույն Սահմանադրական օրենքին համապատասխան և «Ազգային ժողովի պատգամավորների ընտրությունների մասին» օրենքով:

Հոդված 8

 Հայաստանի Հանրապետության այլ օրենսդրական ակտերը գործում են այնքանով, որքանով չեն հակասում սույն Սահմանադրական օրենքին, ինչպես նաև «Ազգային ժողովի պատգամավորների ընտրությունների մասին» օրենքին: