ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
22 սեպտեմբերի 2023 թվականի N 1627-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2004 ԹՎԱԿԱՆԻ ՀՈԿՏԵՄԲԵՐԻ 14-Ի N 1432-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Ղեկավարվելով «Նորմատիվ իրավական ակտերի մասին» օրենքի 33-րդ և 34-րդ հոդվածներով՝ Հայաստանի Հանրապետության կառավարությունը որոշում է.
1. Հայաստանի Հանրապետության կառավարության 2004 թվականի հոկտեմբերի 14-ի «Մարդասիրական օգնության կարգով Հայաստանի Հանրապետության առողջապահության նախարարության անունով ստացվող դեղերի և բժշկական նշանակության ապրանքների պատվերի ձևավորման, ստացման, հաշվառման և բաշխման գործընթացը կանոնակարգելու մասին» N 1432-Ն որոշման (այսուհետ՝ որոշում) մեջ կատարել հետևյալ փոփոխություններն ու լրացումները՝
1) որոշման նախաբանը շարադրել հետևյալ խմբագրությամբ.
«Հիմք ընդունելով «Դեղերի մասին» օրենքի 21-րդ հոդվածի 6-րդ մասի 2-րդ կետը՝ Հայաստանի Հանրապետության կառավարությունը որոշում է.».
2) որոշմամբ հաստատված հավելվածի 9-րդ կետում «այն» բառը փոխարինել «մուտքագրվում է «Արմեդ» համակարգ (այսուհետ՝ համակարգ) և» բառերով.
3) որոշմամբ հաստատված հավելվածի 10.3-րդ կետում «բաշխացուցակները» բառը փոխարինել «բաշխումները հիմնավորող փաստաթղթերը» բառերով.
4) որոշմամբ հաստատված հավելվածի 10.4-րդ կետը շարադրել հետևյալ խմբագրությամբ․
«10.4. Նախարարի հրամանով հաստատված բաշխացուցակները տեղադրվում են նախարարության www.mօհ.am պաշտոնական կայքի «Հայտարարություններ» դարանում: Մարդասիրական օգնության կարգով ստացվող դեղերի ստացման և մնացորդների մասին՝ նախարարության, Երևանի քաղաքապետարանի, Հայաստանի Հանրապետության մարզպետարանների և մարդասիրական օգնություն ստացող կազմակերպությունների տվյալները գրանցվում են համակարգում գործողության կատարմանը զուգահեռ այնպես, որ դրանք արտացոլեն այն ժամանակի տվյալները, որին դրանք վերաբերում են: Այդ տվյալների հասանելիությունը բնակչությանը և գործընթացում ներգրավված կողմերին ապահովում է համակարգում՝ որոնողական գործիքի միջոցով համապատասխան բառերով դեղի որոնում կատարելու հնարավորությամբ։».
5) որոշմամբ հաստատված հավելվածը լրացնել հետևյալ բովանդակությամբ նոր՝ 10.5-րդ և 10.6-րդ կետերով.
«10.5. Որոնման արդյունքում պարտադիր ցուցադրման ենթակա տվյալներ են՝
1) դեղի անունը.
2) պիտանիության ժամկետը.
3) դեղաձևը.
4) դեղաչափը.
5) ակտիվ բաղադրիչները.
6) երկիրը.
7) արտադրողը.
8) դեղի ստացման և ձեռքբերման եղանակը.
9) շահառուների խմբերը և տրամադրման պայմանները.
10) մնացորդի քանակը և գտնվելու վայրը:
10.6. Մարդասիրական օգնության կարգով ստացվող դեղերի վերաբերյալ հասանելի տեղեկատվության աղբյուրների և դրանցից օգտվելու կանոնների մասին եռամսյա պարբերականությամբ բնակչությանն իրազեկվում է զանգվածային լրատվության միջոցների և նախարարության www.mօհ.am պաշտոնական կայքի միջոցով` նախարարության կողմից:».
6) որոշմամբ հաստատված հավելվածի 11-րդ կետը «պատմության մեջ» բառերից հետո լրացնել «, Համակարգի՝ «Պացիենտի առողջության էլեկտրոնային պատմություն» ծրագրային ենթաբաղադրիչի «Ընդունած դեղամիջոցների ցանկ» բաժնում» բառերով:
2. Հայաստանի Հանրապետության առողջապահության նախարարին` եռամսյա ժամկետում ապահովել սույն որոշման 1-ին կետով սահմանված փոփոխություններից և լրացումներից բխող գործընթացների իրականացումը:
3. Սույն որոշման 1-ին կետն ուժի մեջ է մտնում պաշտոնական հրապարակման օրվանից երեք ամիս հետո, որոշման 2-րդ կետն ուժի մեջ է մտնում պաշտոնական հրապարակմանը հաջորդող օրվանից:
|
Հայաստանի Հանրապետության |
Ն. Փաշինյան |
|
Երևան |
|
22.09.2023 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ |
Պաշտոնական հրապարակման օրը՝ 22 սեպտեմբերի 2023 թվական:
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|