ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

7 փետրվարի 1994 թ. N 69

Քաղ. Երևան

ՕՊԵՐԱՏԻՎ ԿԱՌԱՎԱՐՄԱՆ ՍԵՎԱՆԻ ՏԱՐԱԾԱՇՐՋԱՆԱՅԻՆ ՇՏԱԲ ՍՏԵՂԾԵԼՈՒ ՄԱՍԻՆ

Հաշվի առնելով Սևանի տարածաշրջանում (Կրասնոսելսկի, Վարդենիսի, Սևանի, Կամոյի, Մարտունու, Հրազդանի շրջաններ) ստեղծված ռազմաքաղաքական և տնտեսական արտակարգ իրավիճակը, և ելնելով տարածաշրջանի պաշտպանունակության բարձրացման, բնակչության և տնտեսության կենսագործունեության ապահովման անհրաժեշտությունից, Հայաստանի Հանրապետության կառավարությունը որոշում է.

1. Ստեղծել օպերատիվ կառավարման Սևանի տարածաշրջանային շտաբ հետևյալ կազմով`

Ա. Գոմցյան		- ՀՀ կառավարությանն առընթեր «Հայբնակկոմտնտ» հանրապետական միավորման նախագահ (շտաբի պետ)
Լ. Նազարյան		- ՀՀ կառավարության գործերի կառավարչության տասներորդ վարչության պետի տեղակալ (շտաբի պետի տեղակալ)
Ս. Ազարյան		-  ՀՀ արտակարգ իրավիճակների պետական վարչության պետի տեղակալ, քաղաքացիական պաշտպանության հանրապետական շտաբի պետ
Վ. Հարությունյան		- Հայաստանի Հանրապետության վարչապետի խորհրդական
Ս. Այվազյան		- ՀՀ Գերագույն խորհրդի պատգամավոր
Ա. Կիրակոսյան		- ՀՀ թեթև արդյունաբերության նախարարի տեղակալ
Ս. Բարսեղյան		- պատգամավորների Վարդենիսի շրջխորհրդի գործկոմի նախագահ
Վ. Գասպարյան		- ներքին գործերի Սևանի տարածաշրջանային վարչության պետ
Ա. Գրիգորյան		- ՀՀ էներգետիկայի և վառելիքի նախարարության «Հայնավթամթերք» ՀՆՊՁ-ի գլխավոր տնօրենի տեղակալ
Մ. Գրիգորյան		- ՀՀ գլխավոր դատախազի առաջին տեղակալ
Մ. Գրիգորյան		- ՀՀ պարենի և մթերումների նախարարի տեղակալ
Հ. Դարբինյան		- ՀՀ էներգետիկայի և վառելիքի նախարարության վարչության պետ
Դ. Դումանյան		- ՀՀ առողջապահության նախարարի առաջին տեղակալ
Վ. Խոռխոռունի		- ՀՀ պաշտպանության նախարարության զինվորական ոստիկանության պետ
Ա. Հակոբյան		- ՀՀ ազգային անվտանգության պետական վարչության Սևանի տարածաշրջանային վարչության պետ
Ա. Հարությունյան		- ՀՀ պաշտպանության նախարարության գլխավոր վարչության պետ
Վ. Հակոբյան		- պատգամավորների Կամոյի շրջխորհրդի գործկոմի նախագահ
Գ. Հովեյան		- պատգամավորների Կամոյի քաղխորհրդի գործկոմի նախագահ
Գ. Ղազարյան		- ՀՀ կառավարության գործերի կառավարչության տարածքային կառավարման վարչության գլխավոր մասնագետ (շտաբի քարտուղար)
Ռ. Ղուկասյան		- պատգամավորների Սևանի քաղխորհրդի գործկոմի նախագահ
Կ. Ճշմարիտյան		- ՀՀ նյութական ռեսուրսների նախարարի տեղակալ
Ք. Մանուկյան		- պատգամավորների Հրազդանի շրջխորհրդի գործկոմի նախագահ
Գ. Խաչատրյան		- պատգամավորների Հրազդանի քաղխորհրդի գործկոմի նախագահ
Վ. Մարտիրոսյան		- ՀՀ հեռուստատեսության և ռադիոհաղորդումների պետական վարչության պետի տեղակալ
Վ. Պապոյան		- ՀՀ ներքին գործերի նախարարի տեղակալ
Ա. Պետրոսյան		- ՀՀ առևտրի նախարարի տեղակալ
Ա. Անդրեասյան		- ՀՀ կապի նախարարության վարչության պետ
Հ. Սահակյան		- պատգամավորների Մարտունու շրջխորհրդի գործկոմի նախագահ
Զ. Սարգսյան		- պատգամավորների Կրասնոսելսկի շրջխորհրդի գործկոմի նախագահ
Դ. Սիմոնյան		- պատգամավորների Սևանի շրջխորհրդի գործկոմի նախագահ
Վ. Վարդանյան		- ՀՀ զինվորական դատախազ
Հ. Տերյան		- Հայկոոպի վարչության նախագահի առաջին տեղակալ
Ռ. Քրմոյան		- ՀՀ տրանսպորտի և հաղորդակցության նախարարի տեղակալ

2. Օպերատիվ կառավարման Սևանի տարածաշրջանային շտաբին`

ա) հրատապ միջոցներ ձեռնարկել Սևանի տարածաշրջանի տնտեսության առավել արդյունավետ կառավարման ապահովման, պաշտպանական և սոցիալ-տնտեսական խնդիրների լուծման, տնտեսական, նյութատեխնիկական, ֆինանսական, մարդկային ռեսուրսների մոբիլիզացման, Հայաստանի Հանրապետության կառավարության որոշումների, կարգադրությունների և հանձնարարականների օպերատիվ կարգով կատարման ապահովման համար.

բ) ապահովել Հայաստանի Հանրապետության նախարարությունների, պետական վարչությունների, գերատեսչությունների, պատգամավորների տեղական խորհուրդների գործկոմների փոխհամաձայնեցված մասնակցությունը տարածաշրջանի պաշտպանության ամրապնդմանը, բնակչության և տնտեսության բնականոն կենսագործունեության համար անհրաժեշտ պայմանների ստեղծմանն ուղղված աշխատանքներին.

գ) համակարգել և տարածաշրջանի պաշտպանության ամրապնդմանը, հանցագործությունների կանխարգելմանն ու դրանց դեմ պայքարին նպատակաուղղել տարածաշրջանային զինվորական ոստիկանության, ներքին գործերի ու ազգային անվտանգության մարմինների գործունեությունը:

3. Սահմանել, որ`

ա) օպերատիվ կառավարման Սևանի տարածաշրջանային շտաբի` Հայաստանի Հանրապետության օրենսդրությանը չհակասող որոշումները և հրահանգները ենթակա են պարտադիր կատարման պետական կառավարման տեղական մարմինների, հիմնարկների, ձեռնարկությունների, կազմակերպությունների կողմից (անկախ սեփականության ձևից և գերատեսչական ենթակայությունից).

բ) օպերատիվ կառավարման Սևանի տարածաշրջանային շտաբը իր գործունեությամբ հաշվետու է Հայաստանի Հանրապետության կառավարությանը.

գ) օպերատիվ կառավարման Սևանի տարածաշրջանային շտաբի անդամները տարածաշրջանից կարող են բացակայել միայն շտաբի պետի թույլտվությամբ:

4. Հայաստանի Հանրապետության նախարարություններին, պետական վարչություններին, գերատեսչություններին, Սևանի տարածաշրջանի պատգամավորների տեղական խորհուրդների գործկոմներին` օպերատիվ կառավարման Սևանի տարածաշրջանային շտաբին ցույց տալ անհրաժեշտ աջակցություն նրա առջև դրված խնդիրների լուծման, ստեղծված լարված իրավիճակին համապատասխան տարածաշրջանի բնակավայրերում հասարակական պատշաճ կարգուկանոնի հաստատման հարցում:

5. Պատգամավորների Վարդենիսի շրջխորհրդի գործկոմին` օպերատիվ կառավարման Սևանի տարածաշրջանային շտաբի գործունեության համար նրա նստավայրում` Վարդենիս ավանում, ստեղծել անհրաժեշտ աշխատանքային պայմաններ:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ա. ԽԱՉԱՏՐՅԱՆ