Հ Ա Մ Ա Ձ Ա Յ Ն Ա Գ Ի Ր

Տարբեր պետությունների տնտեսվարող սուբյեկտների միջև տնտեսական վեճեր քննելիս պետական տուրքի չափի և դրա գանձման կարգի մասին

Անկախ Պետությունների Համագործակցության մասնակից պետությունները,

հիմնվելով Տնտեսական միության ստեղծման մասին Պայմանագրի վրա և ընդունելով տնտեսական վեճերով արդարադատության իրականացման, Անկախ Պետությունների Համագործակցության մասնակից պետությունների տարածքներում տնտեսվարող սուբյեկտների իրավունքների և շահերի հավասար պաշտպանության ապահովման նկատմամբ միատեսակ մոտեցումների անհրաժեշտությունը,

պայմանավորվեցին ներքոհիշյալի մասին.

Հ ո դ վ ա ծ  1

Սույն Համաձայնագիրը կարգավորում է Անկախ Պետությունների Համագործակցության մասնակից պետությունների արբիտրաժային և տնտեսական դատարանների կողմից արդարադատության իրականացման մասով Տնտեսական միության ստեղծման մասին Պայմանագրի կատարման հետ կապված հարցերը:

Հ ո դ վ ա ծ  2

Տարբեր պետությունների տարածքներում գտնվող տնտեսվարող սուբյեկտների միջև վեճերի կարգավորման ժամանակ օրինական իրավունքների և շահերի դատական պաշտպանության համար, այլ պետության դատարան դիմելիս սահմանել պետական տուրքի դրույքը հայցի արժույթով հայցի գումարի 10 տոկոսի չափով:

Հ ո դ վ ա ծ  3

Ռուբլին սահմանել որպես միասնական դրամային համարժեք Համագործակցության մասնակից պետությունների դատաարբիտրաժային մարմիններում պետական տուրքի վճարման դեպքում: Ռուբլու նկատմամբ ազգային արժույթների փոխարժեքները որոշում են Անկախ Պետությունների Համագործակցության մասնակից պետությունների ազգային բանկերը:

Դատաարբիտրաժային մարմիններում պետական տուրքի վճարումը կատարվում է դատարանի գտնվելու վայրի պետության ազգային արժույթով կամ Ռուսաստանի Դաշնության ռուբլով վերահաշվարկ կատարելով ազգային արժույթների փոխարժեքներով, որոնք որոշում են Անկախ Պետությունների Համագործակցության մասնակից պետությունների ազգային բանկերը:

Համագործակցության մասնակից պետությունների ազգային բանկերը պետք է ապահովեն պետական տուրքի անարգել վճարումը և Անկախ Պետությունների Համագործակցության մասնակից պետությունների արբիտրաժային մարմինների վճիռներով դրամական միջոցների գանձումը:

Վճիռների կատարման նկատմամբ հսկողությունը դրվում է պարտատեր պետությունների բարձրագույն դատաարբիտրաժային (տնտեսական դատարանների) մարմինների վրա:

Հ ո դ վ ա ծ  4

Համագործակցության մասնակից պետությունների գործող օրենսդրությունների ուսումնասիրման, ինչպես նաև դրանց կիրառման պրակտիկայի և արբիտրաժային դատարանների աշխատանքի համար կազմակերպվում է արբիտրաժային-տնտեսական պրակտիկա պարունակող համապատասխան օրենսդրական ակտերի և դատական փաստաթղթերի կանոնավոր փոխանակություն:

Հ ո դ վ ա ծ  5

Սույն Համաձայնագիրը ուժի մեջ է մտնում ստորագրման պահից:

Հ ո դ վ ա ծ  6

Սույն Համաձայնագիրը բաց է այլ պետությունների կողմից միանալու համար:

Հ ո դ վ ա ծ  7

Սույն Համաձայնագրում փոփոխություններն ու լրացումները կատարվում են Համաձայնագիրը ստորագրած պետությունների նախաձեռնությամբ:

Կատարված է Աշգաբատ քաղաքում 1993 թվականի դեկտեմբերի 24-ին, մեկ բնօրինակով` ռուսերեն: Բնօրինակը պահվում է Բելառուսի Հանրապետության Կառավարության արխիվում, որը սույն Համաձայնագիրը ստորագրած պետություններին կուղարկի Համաձայնագրի հաստատված պատճենները: