ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

30 ապրիլի 2002 թվականի

թիվ 128

Ո Ր Ո Շ ՈՒ Մ

«ԼՈՒԾԱՐՄԱՆ ԸՆԹԱՑԱԿԱՐԳՈՒՄ ԳՏՆՎՈՂ ԲԱՆԿԵՐԻ ԵՎ ՎԱՐԿԱՅԻՆ ԿԱԶՄԱԿԵՐՊՈՒԹՅՈՒՆՆԵՐԻ ԼՈՒԾԱՐԱՅԻՆ ԿԱՌԱՎԱՐԻՉՆԵՐԻ ԿՈՂՄԻՑ ԼՈՒԾԱՐԱՅԻՆ ՀԱՇՎԻ ԲԱՑՄԱՆ, ՎԱՐՄԱՆ, ԻՆՉՊԵՍ ՆԱԵՎ ԱՅԼ ԲԱՆԿԵՐՈՒՄ ՀԱՇԻՎՆԵՐԻ ՓԱԿՄԱՆ ԿԱՐԳԸ» ՀԱՍՏԱՏԵԼՈՒ ՄԱՍԻՆ

Հիմք ընդունելով «Բանկերի և վարկային կազմակերպությունների» ՀՀ օրենքի 35-րդ հոդվածը, ղեկավարվելով «Հայաստանի Հանրապետության կենտրոնական բանկի մասին» ՀՀ օրենքի 20-րդ հոդվածի դրույթներով` Հայաստանի Հանրապետության կենտրոնական բանկի խորհուրդը որոշում է`

1. Հաստատել «Լուծարման ընթացակարգում գտնվող բանկերի լուծարային կառավարիչների կողմից լուծարային հաշվի բացման, վարման, ինչպես նաև այլ բանկերում հաշիվների փակման կարգը» (կցվում է):

2. Սույն որոշումն ուժի մեջ է հրապարակման պահից:

(որոշումը փոփ. 05.12.02 թիվ 387-Ն որոշում)

Հաստատված է Հայաստանի Հանրապետության կենտրոնական բանկի խորհրդի 2002 թվականի ապրիլի 30-ի թիվ 128 որոշմամբ

ԿԱՐԳ

ԼՈՒԾԱՐՄԱՆ ԸՆԹԱՑԱԿԱՐԳՈՒՄ ԳՏՆՎՈՂ ԲԱՆԿԵՐԻ ԼՈՒԾԱՐԱՅԻՆ ԿԱՌԱՎԱՐԻՉՆԵՐԻ ԿՈՂՄԻՑ ԼՈՒԾԱՐԱՅԻՆ ՀԱՇՎԻ ԲԱՑՄԱՆ, ՎԱՐՄԱՆ, ԻՆՉՊԵՍ ՆԱԵՎ ԱՅԼ ԲԱՆԿԵՐՈՒՄ ՀԱՇԻՎՆԵՐԻ ՓԱԿՄԱՆ

Սույն կարգի նպատակն է կանոնակարգել լուծարման գործընթացում գտնվող բանկերի լուծարային կառավարիչների կողմից Հայաստանի Հանրապետության տարածքում գործող բանկերում լուծարային հաշվի բացման, վարման, ինչպես նաև այլ բանկերում հաշիվների փակման կարգը և պայմանները:

ԿԱՆՈՆ 1. ԿԱՐԳԻ ԿԱՐԳԱՎՈՐՄԱՆ ԱՌԱՐԿԱՆ

Սույն կարգը սահմանված է համաձայն «Բանկերի և վարկային կազմակերպությունների սնանկության մասին» ՀՀ օրենքի 35-րդ հոդվածի պահանջների և կարգավորում է լուծարման ընթացակարգում գտնվող բանկերի և վարկային կազմակերպությունների (այսուհետև` լուծարվող բանկ) լուծարային կառավարիչների կողմից լուծարային հաշվի բացման, վարման, ինչպես նաև այլ բանկերում հաշիվների փակման կարգը և պայմանները:

(1-ին կանոնը փոփ. 05.12.02 թիվ 387-Ն որոշում)

ԿԱՆՈՆ 2. ՀԱՇՎԻ ԲԱՑՄԱՆ ԿԱՐԳԸ

1. Լուծարվող բանկի լուծարային կառավարիչը դատարանի կողմից լուծարվող բանկի սնանկության և լուծարային կառավարիչ նշանակելու մասին որոշման կայացման պահից եռօրյա ժամկետում պարտավոր է դիմել Հայաստանի Հանրապետության կենտրոնական բանկ (այսուհետև` Կենտրոնական բանկ)` լուծարային հաշիվը սպասարկող բանկի վերաբերյալ Կենտրոնական բանկի համաձայնությունը ստանալու համար: Սույն կետով նախատեսված համաձայնությունը ստանալու դեպքում լուծարային կառավարիչը պարտավոր է համաձայնությունը ստանալու պահից մեկշաբաթյա ժամկետում Հայաստանի Հանրապետության տարածքում գործող բանկերից մեկում բացել բանկի լուծարային հաշիվը:

(2-րդ կանոնի 1-ին կետը փոփ. 05.12.02 թիվ 387-Ն որոշում)

2. Լուծարային կառավարիչը ինքն է որոշում լուծարային հաշիվը սպասարկող բանկը:

3. Լուծարային հաշվին են հաշվեգրվում բանկի բոլոր դրամական միջոցները, ինչպես նաև բանկի լուծարային միջոցների իրացումից ստացված գումարները: Լուծարային հաշիվը լուծարային կառավարչի կողմից չի կարող օգտագործվել «Բանկերի և վարկային կազմակերպությունների սնանկության մասին» ՀՀ օրենքից, ինչպես նաև լուծարվող բանկի լուծարման և պարտատերերի պահանջների բավարարման գործընթացից չբխող նպատակներով:

(2-րդ կանոնի 3-րդ կետը փոփ. 05.12.02 թիվ 387-Ն որոշում)

4. Լուծարային հաշիվը կարող է բացվել և վարվել ինչպես Հայաստանի Հանրապետության դրամով, այնպես էլ Հայաստանի Հանրապետության կենտրոնական բանկի նորմատիվ իրավական ակտերով սահմանված առաջին խմբի արտարժույթների շարքին դասվող արտարժույթով (արտարժույթներով):

5. Լուծարվող բանկը, բացի սույն կարգով սահմանված կարգով բացված հաշվից, այլ հաշիվներ չի կարող ունենալ:

6. Լուծարային հաշիվը պետք է բացվի և վարվի համաձայն լուծարային կառավարչի և լուծարային հաշիվը սպասարկող բանկի միջև կնքված գրավոր պայմանագրի, որը պետք է համապատասխանի Հայաստանի Հանրապետության քաղաքացիական օրենսգրքի 50-րդ գլխով բանկային հաշվի պայմանագրին ներկայացվող պահանջներին:

7. Սույն կանոնի 6-րդ կետում նշված պայմանագիրը, ինչպես նաև դրա հետագա լրացումները և փոփոխությունները կամ դրա շուրջ կնքված այլ պայմանագրերն ու համաձայնագրերը պետք է կնքվեն հայերեն, 3 օրինակից, որոնք պետք է ունենան հավասար իրավաբանական ուժ և վավերացված լինեն բանկի իրավասու անձի և լուծարային կառավարչի ստորագրություններով ու կնիքներով:

8. Սույն կանոնի 6-րդ կետում նշված պայմանագիրը, ինչպես նաև դրա հետագա լրացումների ու փոփոխությունների կամ դրա շուրջ կնքված այլ պայմանագրերի ու համաձայնագրերի մեկական օրինակները լուծարային կառավարիչը պարտավոր է տրամադրել Կենտրոնական բանկին: Սույն կետում նշված պայմանագրերը, համաձայնագրերը, դրանց լրացումները կամ փոփոխությունները պահվում են Կենտրոնական բանկի իրավաբանական վարչությունում:

ԿԱՆՈՆ 3. ՀԱՇՎԻ ՎԱՐՄԱՆ ԿԱՐԳԸ

1. Լուծարային հաշիվը այն սպասարկող բանկի կողմից վարվում է համաձայն ՀՀ օրենսդրության պահանջների:

2. Լուծարային հաշվից միջոցների դուրսգրումն իրականացվում է բացառապես լուծարային կառավարչի հանձնարարականների (կարգադրությունների) հիման վրա:

3. Լուծարային կառավարիչը պարտավոր է յուրաքանչյուր ամսվա ավարտից հետո 3 աշխատանքային օրվա ընթացքում Կենտրոնական բանկի բանկային վերահսկողության համար պատասխանատու ստորաբաժանմանը ներկայացնել լուծարային հաշվով կատարված գործառնությունների մասին գրավոր տեղեկատվություն (լուծարային հաշիվը սպասարկող բանկի կողմից հաստատված հաշվով կատարված գործառնությունների քաղվածք):

4. Լուծարային հաշիվը սպասարկող բանկի պահանջները լուծարային կառավարչին` կապված լուծարային հաշվի վարման, ինչպես նաև հաշվով իրականացված գործառնությունների դիմաց բանկի սակագների կամ դրույքաչափերի վճարման հետ, չեն ընդգրկվում «Բանկերի և վարկային կազմակերպությունների սնանկության մասին» ՀՀ օրենքի 31-րդ հոդվածով սահմանված պահանջների բավարարման հերթականության մեջ:

(3-րդ կանոնը փոփ. 05.12.02 թիվ 387-Ն որոշում)

ԿԱՆՈՆ 4. ԼՈՒԾԱՐԱՅԻՆ ՀԱՇԻՎՆ ԲԱՆԿԻ ԵՎ ԼՈՒԾԱՐԱՅԻՆ ԿԱՌԱՎԱՐՉԻ ՀԱՆԴԻՊԱԿԱՆ ՊԱՀԱՆՋՆԵՐԻ ՀԱՇՎԱՆՑԸ

1. Լուծարային հաշիվը սպասարկող բանկի դրամական պահանջները լուծարային կառավարչին` կապված բանկի կողմից մատուցված ծառայությունների համար վճարման հետ, ինչպես նաև տոկոսներ վճարելու մասին լուծարային կառավարչի պահանջները բանկին կարող են դադարել հաշվանցով:

2. Սույն կանոնով նախատեսված հանդիպական պահանջների հաշվանցը իրականացնում է լուծարային հաշիվը սպասարկող բանկը:

ԿԱՆՈՆ 5. ԼՈՒԾԱՐԱՅԻՆ ՀԱՇՎԻ ԲԱՑՄԱՆ ՈՒ ՎԱՐՄԱՆ ՊԱՅՄԱՆԱԳՐԻ ԼՈՒԾՈՒՄԸ ԵՎ ԼՈՒԾԱՐԱՅԻՆ ՀԱՇՎԻ ՓԱԿՈՒՄԸ

«Բանկերի և վարկային կազմակերպությունների սնանկության մասին» ՀՀ օրենքի 32-րդ հոդվածով նախատեսված կարգով դատարանի կողմից բանկի լուծարման հաշվեկշիռը հաստատելու մասին որոշումը, այն օրինական ուժի մեջ մտնելու պահից մեկօրյա ժամկետում լուծարային կառավարիչը ներկայացնում է լուծարային հաշիվը սպասարկող բանկին: Սույն կետով նախատեսված որոշումը ստանալու օրը լուծարային հաշվի բացման և վարման պայմանագիրը համարվում է լուծված, իսկ լուծարային հաշիվը` փակված:

(5-րդ կանոնը փոփ. 05.12.02 թիվ 387-Ն որոշում)

ԿԱՆՈՆ 6. ԼՈՒԾԱՐԱՅԻՆ ԿԱՌԱՎԱՐՉԻ ԿՈՂՄԻՑ ԼՈՒԾԱՐՎՈՂ ԲԱՆԿԻ` ԱՅԼ ԲԱՆԿԵՐՈՒՄ ԳՏՆՎՈՂ ՀԱՇԻՎՆԵՐԻ ՓԱԿՈՒՄԸ

Լուծարային կառավարիչը պարտավոր է դատարանի կողմից իր նշանակման պահից երկշաբաթյա ժամկետում փակել Կենտրոնական բանկում և այլ բանկերում (Հայաստանի Հանրապետության տարածքում կամ արտերկրում գործող) գտնվող լուծարվող բանկի թղթակցային հաշիվները, թղթակցային ենթահաշիվները, ինչպես նաև այլ բանկային հաշիվներն ու դրանցում առկա միջոցները փոխանցել սույն կարգով բացված լուծարային հաշվին:

ԿԱՆՈՆ 7. ԱՆՑՈՒՄԱՅԻՆ ԴՐՈՒՅԹՆԵՐ

Մինչև «Բանկերի և վարկային կազմակերպությունների սնանկության մասին» Հայաստանի Հանրապետության օրենքի ուժի մեջ մտնելը նշանակված լուծարային կառավարիչները պետք է առաջնորդվեն սույն կարգով:

(7-րդ կանոնը փոփ. 05.12.02 թիվ 387-Ն որոշում)