«Գրանցված է»

ՀՀ արդարադատության

նախարարության կողմից

15 հուլիսի 2005 թ.

Պետական գրանցման թիվ 05005289

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

22 հունիսի 2005 թ.

N 317-Ն

Ո Ր Ո Շ ՈՒ Մ

«ԴՐԱՄԱԿԱՆ (ՓՈՂԱՅԻՆ) ՓՈԽԱՆՑՈՒՄՆԵՐ ԻՐԱԿԱՆԱՑՆՈՂ ԿԱԶՄԱԿԵՐՊՈՒԹՅՈՒՆՆԵՐԻ ԿՈՂՄԻՑ ՎՃԱՐԱՀԱՇՎԱՐԿԱՅԻՆ ԾԱՌԱՅՈՒԹՅՈՒՆՆԵՐԻ ՀԱՇՎԱՌՄԱՆ ԿԱՐԳԸ» ՀԱՍՏԱՏԵԼՈՒ ՄԱՍԻՆ

Հիմք ընդունելով «Վճարահաշվարկային համակարգերի  և վճարահաշվարկային կազմակերպությունների մասին» Հայաստանի Հանրապետության օրենքի 25-րդ հոդվածի 1-ին  մասը և ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «ե» կետով՝ Հայաստանի Հանրապետության կենտրոնական բանկի խորհուրդը որոշում է.

1. Հաստատել «Դրամական (փողային) փոխանցումներ իրականացնող կազմակերպությունների կողմից վճարահաշվարկային ծառայությունների հաշվառման կարգը» համաձայն հավելվածի (կցվում է):

2. Սույն որոշումն ուժի մեջ է մտնում  հրապարակմանը հաջորդող տասներորդ օրվանից:

ՀՀ կենտրոնական բանկի նախագահ	Տ. Սարգսյան
2005 թ. հունիսի 24 Երևան

Հավելված ՀՀ կենտրոնական բանկի խորհրդի 2005 թվականի հունիսի 22-ի թիվ 317-Ն որոշման

Կ Ա Ր Գ

ԴՐԱՄԱԿԱՆ (ՓՈՂԱՅԻՆ) ՓՈԽԱՆՑՈՒՄՆԵՐ ԻՐԱԿԱՆԱՑՆՈՂ ԿԱԶՄԱԿԵՐՊՈՒԹՅՈՒՆՆԵՐԻ ԿՈՂՄԻՑ ՎՃԱՐԱՀԱՇՎԱՐԿԱՅԻՆ ԾԱՌԱՅՈՒԹՅՈՒՆՆԵՐԻ ՀԱՇՎԱՌՄԱՆ

1. Դրամական (փողային) փոխանցումներ իրականացնող կազմակերպությունները (այսուհետ՝ կազմակերպությունները) առանձին վարում են իրենց կողմից մատուցված վճարահաշվարկային ծառայությունների հաշվառում: Հաշվառումը վարվում է դրամական փոխանցումների գծով մատուցված ծառայությունների գրանցման միջոցով:

2. Հաշվառումը տարվում է ամփոփ և ըստ տվյալ կազմակերպության աշխատանքային օրերի:

3. Հաշվառումը տարվում է ըստ հետևյալ տարրերի ՝

3.1 կազմակերպության կողմից դրամական փոխանցումների իրականացման  համակարգերի, այն է՝

3.1.1 դրամական փոխանցումների ոչ բանկային այլընտրանքային համակարգերի (Վեստերն Յունիոն, Մոնեյ Գրէմ և այլ նմանատիպ համակարգերի) միջոցով վճարումների իրականացումը,

3.1.2 կազմակերպության ներքին (մասնաճյուղային) ցանցի միջոցով վճարումների իրականացումը,

3.1.3 բանկի կամ այլ կազմակերպության միջոցով վճարումների կատարումը:

3.2 Ըստ 3.1 ենթակետում նշված յուրաքանչյուր դրամական փոխանցումների իրականացման համակարգի՝ առանձին նշվում են ընդունված (ուղարկված) և վճարված (ստացված) դրամական միջոցները:

Ընդունված (ուղարկված) են համարվում հաշվետու օրվա ընթացքում կազմակերպության կողմից ստացված դրամական միջոցները, որոնք վճարողների կարգադրությունների համապատասխան կազմակերպության կողմից պետք է վճարվեն համապատասխան շահառուներին:

Վճարված (ստացված) են համարվում հաշվետու օրվա ընթացքում կազմակերպության կողմից շահառուներին վճարված դրամական միջոցները:

3.3 Կազմակերպության կողմից դրամական փոխանցումների տեսակների, այն է՝

3.3.1 մասնավոր փոխանցումներ (ֆիզիկական անձանց միջև փոխանցումներ, ֆիզիկական և տնտեսվարող անձանց միջև փոխանցումներ և այլ նմանատիպ փոխանցումներ),

3.3.2 կոմունալ վճարումներ,

3.3.3 բյուջետային վճարումներ,

3.3.4 կենսաթոշակային,  սոցիալական նպաստների վճարումներ,

3.3.5 այլ  վճարումներ, որոնք ընդգրկված չեն 3.3.1, 3.3.2, 3.3.3 և 3.3.4 ենթակետերում:

4. Կազմակերպության կողմից հաշվառումը տարվում է ըստ արժույթների, քանակի և ընդհանուր գումարի:

5. Եթե կազմակերպությունը իրականացնում է իր կողմից մատուցվող վճարահաշվարկային ծառայությունները և սույն կարգով սահմանված հաշվառումը համապատասխան համակարգչային սարքավորման /ծրագրի/ միջոցով, ապա յուրաքանչյուր աշխատանքային օրվա վերջում համակարգչային ծրագրից տպվում են սույն կարգով սահմանված հաշվառման տվյալները, ստորագրվում են կազմակերպության ղեկավարի կողմից և կարվում են հատուկ թղթապանակում:

6. Այն դեպքում, երբ սույն կարգով սահմանված հաշվառումը իրականացվում է թղթային եղանակով, ապա այն վարվում է հատուկ մատյանում:

7. Կազմակերպության կողմից ստացված վճարահաշվարկային ծառայությունների մատուցման կարգադրությունները, կատարումը հիմնավորող փաստաթղթերը, սույն կարգում սահմանված հաշվառման տվյալները և կազմակերպության կողմից մատուցվող վճարահաշվարկային ծառայությունների գծով հաշվառման այլ տարրերը պետք է  պահպանվեն կազմակերպության կողմից առնվազն 5 տարի: