Ա Ր Ձ Ա Ն Ա Գ Ր Ո Ւ Թ Յ Ո Ւ Ն   Թ Ի Վ   2

1987 թվականի նոյեմբերի 26-ին Ստրասբուրգում ստորագրված` Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման մասին եվրոպական կոնվենցիայի (այսուհետև` Կոնվենցիա) սույն Արձանագրությունը ստորագրած պետությունները,

համոզված լինելով Խոշտանգումների և անմարդկային կամ արժանապատվությունը նվաստացնող վերաբերմունքի և պատժի կանխարգելման մասին Եվրոպական կոմիտեի (այսուհետև՝ Կոմիտե) անդամներին երկրորդ անգամ վերընտրվելու հնարավորություն տալու նպատակահարմարության հարցում,

նկատի ունենալով նաև Կոմիտեի անդամության կանոնավոր նորացումը երաշխավորելու անհրաժեշտությունը,

համաձայնեցին հետևյալի մասին.

Հ ո դ վ ա ծ  1

1. 5-րդ հոդվածի 3-րդ կետի երկրորդ նախադասությունը շարադրվում է հետևյալ կերպ.

«Նրանք կարող են վերընտրվել երկու անգամ»:

2. Կոնվենցիայի 5-րդ հոդվածը լրացվում է հետևյալ 4-րդ և 5-րդ կետերով.

«4. Հնարավորության դեպքում Կոմիտեի անդամների կեսի երկու տարին մեկ նորացումը ապահովելու նպատակով Նախարարների կոմիտեն կարող է որոշել, որ, մինչև հաջորդ ընտրությունն անցնելը, ընտրվելիք անդամների մեկ կամ ավելի անդամների պաշտոնավարման ժամկետը կամ ժամկետները կլինեն այլ, քան չորս տարին, բայց ոչ ավելի, քան վեց և ոչ պակաս, քան երկու տարին:

5. Այն դեպքերում, երբ մեկից ավելի պաշտոնավարման ժամկետ է ներառված, և Նախարարների կոմիտեն կիրառում է նախորդ կետը, պաշտոնավարման ժամկետների բաշխումը կիրականացվի Գլխավոր քարտուղարի կողմից ընտրությունից անմիջապես հետո կատարվող վիճակահանությամբ»:

Հ ո դ վ ա ծ  2

1. Սույն Արձանագրությունը բաց է ստորագրման համար Կոնվենցիան ստորագրած պետությունների կողմից, որոնք կարող են արտահայտել իրենց համաձայնությունը` պարտավորված լինելով`

ա) ստորագրմամբ` առանց վավերացման, ընդունման կամ հաստատման պայմանի, կամ

բ) ստորագրմամբ` վավերացման, ընդունման կամ հաստատման պայմանով, որին հետևում է վավերացումը, ընդունումը կամ հաստատումը:

2. Վավերագրերը, ընդունման կամ հաստատման փաստաթղթերը ի պահ են տրվում Եվրոպայի խորհրդի Գլխավոր քարտուղարին:

Հ ո դ վ ա ծ  3

Սույն Արձանագրությունն ուժի մեջ կմտնի այն օրվանից երեք ամիս ժամկետի լրանալուն հաջորդող ամսվա առաջին օրը, երբ Կոնվենցիայի բոլոր Կողմերը համաձայնություն կհայտնեն ստանձնելու Արձանագրությամբ նախատեսված պարտավորությունները` 2-րդ հոդվածի դրույթներին համապատասխան:

Հ ո դ վ ա ծ  4

Եվրոպայի խորհրդի Գլխավոր քարտուղարը կծանուցի Եվրոպայի խորհրդի անդամ պետություններին և Կոնվենցիայի Կողմ հանդիսացող ոչ անդամ պետություններին`

ա) ցանկացած ստորագրման մասին.

բ) ցանկացած վավերագրի, ընդունման կամ հաստատման փաստաթուղթ ի պահ տալու մասին.

գ) 3-րդ հոդվածին համապատասխան սույն Արձանագրության ուժի մեջ մտնելու ամսաթվի մասին.

դ) սույն Արձանագրության հետ կապված ցանկացած այլ գործողության, ծանուցման կամ հաղորդման մասին:

Ի վկայումն վերոշարադրյալի` ներքոստորագրյալները, պատշաճորեն լիազորված լինելով, ստորագրեցին սույն Արձանագրությունը:

Կատարված է Ստրասբուրգում 1993 թվականի նոյեմբերի 4-ին՝ ֆրանսերեն և անգլերեն, ընդ որում երկու տեքստերն էլ հավասարազոր են, մեկ բնօրինակով, որը ի պահ կտրվի Եվրոպայի խորհրդի արխիվներին: Եվրոպայի խորհրդի Գլխավոր քարտուղարը հաստատված պատճեններն ուղարկում է Եվրոպայի խորհրդի անդամ յուրաքանչյուր պետության:

* Արձանագրությունը Հայաստանի Հանրապետության համար ուժի մեջ է մտել 2002 թվականի հոկտեմբերի 1-ից: