Հ Ա Մ Ա Ձ Ա Յ Ն Ա Գ Ի Ր

Անկախ Պետությունների Համագործակցության մասնակից պետությունների միջտարածաշրջանային եվ մերձսահմանային համագործակցության խորհրդի մասին

Անկախ Պետությունների Համագործակցության մասնակից պետությունները, այսուհետ՝ Կողմեր,

ձգտելով տարածաշրջանային և մերձսահմանային փոխադարձ համագործակցության հետագա զարգացմանը,

գիտակցելով, որ այդ համագործակցության զարգացումը համապատասխանում է իրենց ժողովուրդների շահերին,

համաձայնեցին ներքոհիշյալի մասին.

Հոդված 1

Կողմերն ստեղծում են Անկախ Պետությունների Համագործակցության մասնակից պետությունների միջտարածաշրջանային և մերձսահմանային համագործակցության խորհուրդ (այսուհետ` Խորհուրդ), որի կազմի մեջ մտնում են սույն Համաձայնագրի մասնակից պետությունների` միջտարածաշրջանային և մերձսահմանային համագործակցության համար պատասխանատու նախարարությունների (գերատեսչությունների) ղեկավարները:

Հոդված 2

Խորհուրդն իր գործունեությունն իրականացնում է խորհրդի Կանոնադրության հիման վրա, որը կցվում է սույն Համաձայնագրին և հանդիսանում է դրա անբաժանելի մասը:

Հոդված 3

Սույն Համաձայնագիրն ուժի մեջ է մտնում այն ստորագրած Կողմերի` դրա ուժի մեջ մտնելու համար անհրաժեշտ ներպետական ընթացակարգերը կատարելու մասին երրորդ գրավոր ծանուցումն ավանդապահի ստանալու օրվանից:

Ներպետական ընթացակարգերն ավելի ուշ կատարած Կողմերի համար սույն Համաձայնագիրն ուժի մեջ է մտնում համապատասխան ծանուցումներն ավանդապահի ստանալու օրվանից:

Հոդված 4

Կողմերի փոխադարձ համաձայնությամբ սույն Համաձայնագրում կարող են կատարվել փոփոխություններ և լրացումներ, որոնք ձևակերպվում են սույն Համաձայնագրի անբաժանելի մասը հանդիսացող համապատասխան արձանագրությամբ:

Հոդված 5

Սույն Համաձայնագիրը բաց է Անկախ Պետությունների Համագործակցության մյուս մասնակից պետությունների միանալու համար, որոնք ընդունում են դրա դրույթները և պատրաստ են ստանձնել սույն Համաձայնագրից բխող պարտավորությունները:

Միացող պետության համար սույն Համաձայնագիրն ուժի մեջ է մտնում միանալու մասին փաստաթղթերն ավանդապահի ստանալու օրվանից:

Հոդված 6

Կողմերից յուրաքանչյուրը կարող է դուրս գալ սույն Համաձայնագրից` նման մտադրության մասին ավանդապահին գրավոր ծանուցում ուղարկելով դուրս գալուց առնվազն 6 ամիս առաջ:

Կատարված է Բիշկեկ քաղաքում 2008 թվականի հոկտեմբերի 10-ին մեկ ռուսերեն բնօրինակով: Բնօրինակը պահվում է Անկախ Պետությունների Համագործակցության գործադիր կոմիտեում, որը դրա հաստատված պատճենը կուղարկի սույն Համաձայնագիրն ստորագրած յուրաքանչյուր պետության:

Համաձայնագիրն ստորագրվել է Հայաստանի Հանրապետության, Բելառուսի Հանրապետության, Ղազախստանի Հանրապետության, Ղրղզստանի Հանրապետության, Ռուսաստանի Դաշնության, Տաջիկստանի Հանրապետության կողմից:

Հավելված

Անկախ Պետությունների

Համագործակցության

մասնակից պետությունների

միջտարածաշրջանային և

մերձսահմանային համագործակցության

խորհրդի մասին

2008 թվականի հոկտեմբերի

10-ի Համաձայնագրին կից

Կանոնադրություն

Անկախ Պետությունների Համագործակցության մասնակից պետությունների միջտարածաշրջանային և մերձսահմանային համագործակցության խորհրդի

I. Ընդհանուր դրույթներ

1.1. Անկախ Պետությունների Համագործակցության մասնակից պետությունների միջտարածաշրջանային և մերձսահմանային համագործակցության խորհուրդը (այսուհետ` Խորհուրդ) ստեղծվում է տարածաշրջանների և սահմանամերձ տարածքների կայուն տնտեսական զարգացման, քաղաքացիների անվտանգության ապահովման, ԱՊՀ մասնակից պետությունների բարեկամության և բարիդրացիության ամրապնդման հարցերի լուծման գործում Անկախ Պետությունների Համագործակցության մասնակից պետությունների բազմակողմ փոխգործակցության համակարգման նպատակով: Խորհուրդն իրականացնում է իր գործունեությունը` սերտորեն համագործակցելով ԱՊՀ տնտեսական խորհրդի, Համագործակցության կանոնադրական և այլ մարմիններին կից՝ Համագործակցության մասնակից պետությունների մշտական լիազոր ներկայացուցիչների խորհրդի, ԱՊՀ տնտեսական խորհրդին կից Տնտեսական հարցերով հանձնաժողովի և ԱՊՀ գործադիր կոմիտեի, ինչպես նաև Համագործակցության այլ մարմինների հետ:

1.2. Խորհրդի հիմնական խնդիրներն են ԱՊՀ մասնակից պետությունների պետական իշխանության և տեղական ինքնակառավարման մարմինների փոխադարձ համագործակցության մեխանիզմների կատարելագործումն ու զարգացումը:

1.3. Իր գործունեության մեջ Խորհուրդն առաջնորդվում է միջազգային իրավունքի հանրաճանաչ սկզբունքներով և նորմերով, ԱՊՀ հիմնարար փաստաթղթերով, Անկախ Պետությունների Համագործակցության մասնակից պետությունների միջտարածաշրջանային և մերձսահմանային համագործակցության հայեցակարգով` հաստատված ԱՊՀ կառավարությունների ղեկավարների խորհրդի 2004 թվականի սեպտեմբերի 15-ի որոշմամբ, ԱՊՀ պետությունների ղեկավարների խորհրդի և կառավարությունների ղեկավարների խորհրդի` միջտարածաշրջանային և մերձսահմանային համագործակցությանը վերաբերող որոշումներով, ինչպես նաև սույն Կանոնադրությամբ:

II. Խորհրդի գործառույթները

Խորհուրդը կատարում է հետևյալ գործառույթները.

2.1. Համաձայնագրի մասնակից պետությունների միջտարածաշրջանային և մերձսահմանային համագործակցության առաջնային ուղղությունների որոշում, հայեցակարգային և գործնական հարցերի քննարկում` հաշվի առնելով ԱՊՀ մասնակից պետությունների պետական կառավարման, տեղական ինքնակառավարման մարմինների, իրավաբանական անձանց, հասարակական կազմակերպությունների առաջարկությունները:

2.2. Միջտարածաշրջանային և մերձսահմանային համագործակցության հիմնական ուղղություններով համատեղ գործողությունների համակարգման վերաբերյալ առաջարկությունների մշակում:

2.3. ԱՊՀ պետությունների ղեկավարների խորհրդի, կառավարությունների ղեկավարների խորհրդի և ԱՊՀ ճյուղային համագործակցության մարմինների նիստերի ժամանակ քննարկման համար միջտարածաշրջանային և մերձսահմանային համագործակցության հետագա զարգացման վերաբերյալ առաջարկությունների նախապատրաստում:

2.4. Համաձայնագրի մասնակից պետությունների միջտարածաշրջանային և մերձսահմանային համագործակցության հարցերով փոխհարաբերությունների նորմատիվ-իրավական կարգավորման վերաբերյալ առաջարկությունների մշակում:

III. Խորհրդի իրավունքները

Խորհուրդն իր գործառույթներն իրականացնելու համար իրավունք ունի.

3.1. Համագործակցության բարձրագույն մարմինների քննարկմանը սահմանված կարգով ներկայացնելու Խորհրդի կողմից պատրաստված փաստաթղթերի նախագծեր, ինչպես նաև միջտարածաշրջանային և մերձսահմանային հարցերի վերաբերյալ որոշումների կատարման մասին տեղեկատվություն:

3.2. Համաձայնագրի մասնակից պետություններից և ԱՊՀ ճյուղային համագործակցության մարմիններից սահմանված կարգով հայցելու տեղեկատվություն իր իրավասության մեջ մտնող հարցերի վերաբերյալ:

3.3. Անհրաժեշտության դեպքում ստեղծելու մշտական կամ ժամանակավոր աշխատանքային խմբեր Խորհրդի առջև հառնած խնդիրների կատարման համար:

IV. Խորհրդի ձևավորման կարգը

4.1. Խորհրդի անդամներ են հանդիսանում Համաձայնագրի մասնակից պետություններում միջտարածաշրջանային և մերձսահմանային համագործակցության համար պատասխանատու նախարարությունների (գերատեսչությունների) ղեկավարները կամ Համաձայնագրի մասնակից պետությունների լիազորված ներկայացուցիչները (յուրաքանչյուր պետությունից՝ մեկական): Աշխատանքին Խորհրդի անդամի չմասնակցելու դեպքում նրա իրավասությունները փոխանցվում են նախարարության (գերատեսչության) ղեկավարի տեղակալին` այդ մասին նախապես ծանուցելով (հաղորդելով) Խորհրդի քարտուղարությանը:

4.2. Խորհրդում նախագահությունն իրականացվում է հերթով, Համաձայնագրի մասնակից պետություններից յուրաքանչյուրի կողմից` ի դեմս դրա ներկայացուցչի, ըստ ռուսական այբբենակարգի ռոտացիայի սկզբունքի հիման վրա, մեկ տարուց ոչ ավելի ժամկետով:

Խորհրդի նախորդ և հաջորդ նախագահները հանդիսանում են դրա համանախագահներ:

Խորհրդի նախագահի ժամանակավոր բացակայության դեպքում նրա պարտականությունները դրվում են համանախագահներից մեկի վրա:

V. Աշխատանքի կազմակերպումը

5.1. Խորհրդի նիստերն անց են կացվում առնվազն տարին մեկ անգամ: Ըստ անհրաժեշտության՝ կարող են գումարվել արտահերթ նիստեր: Նիստերը համարվում են իրավազոր, եթե դրանց մասնակցում է Խորհրդի անդամների առնվազն երկու երրորդը: Խորհրդի արտահերթ նիստ հրավիրվում է նախագահի կողմից՝ նրա նախաձեռնությամբ կամ Խորհրդի առնվազն երեք անդամի նախաձեռնությամբ:

5.2. Նիստերի անցկացման վայրը որոշվում է Խորհրդի անդամների նախնական պայմանավորվածությամբ:

5.3. Խորհրդի նիստերին խորհրդակցական ձայնի իրավունքով կարող են մասնակցել ԱՊՀ ճյուղային համագործակցության մարմինների և գործադիր կոմիտեի ղեկավարները:

5.4. Խորհրդի որոշմամբ դրա նիստերին դիտորդի կարգավիճակով կարող են մասնակցել ԱՊՀ մասնակից պետությունների օրենսդիր իշխանության մարմինների, վարչատարածքային միավորների և տեղական ինքնակառավարման իշխանության մարմինների, առևտրաարդյունաբերական պալատների, ԱՊՀ մասնակից պետությունների ձեռնարկությունների և կազմակերպությունների, ինչպես նաև միջտարածաշրջանային և մերձսահմանային համագործակցություն իրականացնող միջազգային կազմակերպությունների ներկայացուցիչներ:

5.5. Խորհրդի որոշումներն ընդունվում են դրա` նիստին ներկա անդամների ձայների պարզ մեծամասնությամբ, եթե Խորհրդի կողմից այլ բան որոշված չէ: Խորհրդի ցանկացած անդամ կարող է հայտարարել այս կամ այն հարցում իր հետաքրքրված չլինելու մասին, ինչը չպետք է դիտվի որպես խոչընդոտ որոշման ընդունման համար: Խորհրդի այն անդամները, որոնք համաձայն չեն որոշմանը, կարող են հայտնել հատուկ կարծիք, որն ընդգրկվում է նիստի արձանագրության մեջ:

5.6. Խորհրդի որոշումները ձևակերպվում են արձանագրություններով, որոնք ստորագրվում են Խորհրդի նախագահի կողմից և ուղարկվում են Խորհրդի անդամներին, իսկ անհրաժեշտության դեպքում` ԱՊՀ մարմիններ: Խորհրդի որոշումներն ունեն խորհրդատվական բնույթ:

5.7. Խորհուրդը հաստատում է իր աշխատակարգը:

5.8. Հերթական նիստի համար նյութերն ուղարկվում են Խորհրդի անդամներին դրա անցկացման օրվանից առնվազն 30 օր առաջ:

5.9. Խորհրդի քարտուղարի գործառույթները կատարում է ԱՊՀ գործադիր կոմիտեի համապատասխան կառուցվածքային ստորաբաժանումը:

VI. Եզրափակիչ դրույթներ

6.1. Խորհրդի նիստերի անցկացման ծախսերը կրում է Համաձայնագրի այն մասնակից պետությունը, որի տարածքում անցկացվում է Խորհրդի նիստը: Խորհրդի անդամների գործուղման ծախսերը կրում է գործուղող պետությունը:

6.2. Խորհրդի աշխատանքային լեզուն ռուսերենն է:

Համաձայնագիրն ուժի մեջ է մտել Հայաստանի Հանրապետության համար` 15.05.2009թ., Տաջիկստանի Հանրապետության համար` 15.05.2009թ., Բելառուսի Հանրապետության համար` 15.05.2009թ.: