Հ Ա Մ Ա Ձ Ա Յ Ն Ա Գ Ի Ր

«ԱՊՀ գորգեր» անդրազգային կորպորացիայի ստեղծման մասին

Սույն Համաձայնագրի մասնակից պետությունների Կառավարությունները, այսուհետ՝ Կողմեր,

ղեկավարվելով Տնտեսական միության ստեղծման մասին 1993 թվականի սեպտեմբերի 24-ի՝ Պայմանագրի, Արտադրական, առևտրական, վարկաֆինանսական, ապահովագրական և խառը անդրազգային միավորումների ստեղծմանը և զարգացմանը աջակցելու մասին 1994 թվականի ապրիլի 15-ի՝ Համաձայնագրի դրույթներով,

ընդունելով թեթև արդյունաբերության ձեռնարկությունների աշխատանքի արդյունավետության բարձրացման համար ջանքերի միավորման և համակարգման կարևորությունը,

ելնելով գորգերի և գորգարտադրանքի մրցունակության բարձրացման անհրաժեշտությունից,

մեծ նշանակություն տալով շուկայագիտության կատարելագործմանը և ապրանքաբաշխիչ ցանցի զարգացմանը,

համաձայնեցին ներքոհիշյալի մասին.

Հ ո դ վ ա ծ  1

Կողմերը աջակցում են «ԱՊՀ գորգեր» անդրազգային կորպորացիա (այսուհետ՝ Կորպորացիա) ոչ առևտրական կազմակերպության ստեղծմանը սեփականության տարբեր ձևերի ձեռնարկությունների և կազմակերպությունների հիման վրա:

Հ ո դ վ ա ծ  2

Կորպորացիայի հիմնական նպատակն է՝

գորգերի և գորգարտադրանքի արտադրության զարգացում,

այդ արտադրանքի մրցունակության բարձրացում,

գորգարտադրանքի արտադրողների և հումքի մատակարարների միջև փոխշահավետ կապերի զարգացում,

շուկայագիտության և տեխնիկական քաղաքականության բնագավառում համաձայնեցված գործողությունների իրականացում,

թողարկվող արտադանքի սպառողական հատկանիշների, տեխնոլոգիական և տնտեսական չափանիշների բարելավման ուղղությամբ հանձնարարականների մշակում,

շուկայի պահանջների մասին տեղեկության պատրաստում,

գորգերի և գորգարտադրանքի իրացման համար բարենպաստ պայմանների ստեղծում:

Հ ո դ վ ա ծ  3

Կորպորացիան բաց է սույն Համաձայնագրի մասնակից պետությունների այլ տնտեսվարող սուբյեկտների միանալու համար՝ Կորպորացիայի հիմնադիր փաստաթղթերով նախատեսված կարգով և պայմաններով:

Հ ո դ վ ա ծ  4

Անհրաժեշտության դեպքում, Կողմերը կարող են Կորպորացիայի մասնակիցներին տրամադրել պետական աջակցություն և երաշխիքներ, որոնք նախատեսված են սույն Համաձայնագրի մասնակից պետությունների օրենսդրություններով:

Հ ո դ վ ա ծ  5

Կորպորացիայի հիմնադիրները իրավաբանական անձինք են, որոնք ընդունում են Կորպորացիայի նպատակներն ու խնդիրները, կատարել են հիմնադիր մուծումները, ստորագրել են նրա հիմնադիր պայմանագիրը, պահպանում են կանոնադրությունը և հիմնադիր պայմանագիրը:

Կորպորացիայի մասնակիցների իրավունքներն ու պարտականությունները սահմանվում են հիմնադիր փաստաթղթերով:

Հ ո դ վ ա ծ  6

Կորպորացիան իրավաբանական անձ է և անցնում է պետական գրանցում Ռուսաստանի Դաշնության լիազորված մարմիններում՝ Ռուսաստանի օրենսդրությանը համապատասխան:

Կորպորացիայի մասնակից ձեռնարկությունները և կազմակերպությունները պահպանում են իրավաբանական անձի կարգավիճակը, կազմակերպաիրավական ձևը, պետական և գերատեսչական պատկանելությունը և իրականացնում են իրենց գործունեությունը իրենց պետությունների օրենսդրության հիման վրա՝ հաշվի առնելով սույն Համաձայնագրի դրույթները:

Հ ո դ վ ա ծ  7

Սույն Համաձայնագիրը չի շոշափում Կողմերի՝ այլ միջազգային պայմանագրերից բխող իրավունքներն ու պարտավորությունները, որոնց մասնակից են նրանք հանդիսանում:

Հ ո դ վ ա ծ  8

Սույն Համաձայնագիրը բաց է Համաձայնագրի նպատակները և սկզբունքները կիսող այլ պետությունների միանալու համար՝ բոլոր Կողմերի համաձայնությամբ, միանալու մասին փաստաթղթերը ավանդապահին հանձնելու միջոցով: Միանալը համարվում է ուժի մեջ մտած` միանալու համաձայնության մասին վերջին ծանուցումը ավանդապահի ստանալու օրվանից:

Հ ո դ վ ա ծ  9

Կողմերի փոխադարձ պայմանավորվածությամբ սույն Համաձայնագրում կարող են կատարվել առանձին արձանագրություններով ձևակերպված փոփոխություններ և լրացումներ, որոնք ուժի մեջ կմտնեն սույն Համաձայնագրի 11-րդ հոդվածով նախատեսված կարգով:

Հ ո դ վ ա ծ  10

Սույն Համաձայնագրի կիրառման և մեկնաբանման հետ կապված վիճելի հարցերը շահագրգիռ Կողմերի միջև լուծվում են խորհրդակցությունների և բանակցությունների միջոցով:

Հ ո դ վ ա ծ  11

Սույն Համաձայնագիրն ուժի մեջ է մտնում այն ստորագրած պետությունների կողմից ուժի մեջ մտնելու համար անհրաժեշտ՝ ներպետական ընթացակարգերի կատարման մասին երրորդ ծանուցումը ավանդապահին ի պահ հանձնելու օրվանից:

Անհրաժեշտ ընթացակարգերն ավելի ուշ կատարած Կողմերի համար Համաձայնագիրն ուժի մեջ է մտնում համապատասխան փաստաթղթերը ավանդապահին ի պահ հանձնելու օրվանից:

Հ ո դ վ ա ծ  12

Յուրաքանչյուր Կողմ իրավունք ունի դուրս գալ սույն Համաձայնագրից` դուրս գալուց ոչ ուշ, քան վեց ամիս առաջ այդ մասին գրավոր ծանուցում ուղարկելով ավանդապահին և կարգավորելով Համաձայնագրի գործողության ընթացքում ծագած պարտավորությունները:

Հ ո դ վ ա ծ  13

Սույն Համաձայնագիրը կնքվում է 5 տարով և ինքնաբերաբար կերկարաձգվի հաջորդ 5-ամյա ժամանակահատվածով, եթե Կողմերը այլ որոշում չընդունեն:

Կատարված է Յալթա քաղաքում 1999 թվականի հոկտեմբերի 8-ին, մեկ բնօրինակով` ռուսերեն: Բնօրինակը պահվում է Անկախ Պետությունների Համագործակցության Գործադիր կոմիտեում, որը սույն Համաձայնագիրը ստորագրած յուրաքանչյուր պետության կուղարկի դրա հաստատված պատճենը:

*Համաձայնագիրը Հայաստանի Հանրապետության համար ուժի մեջ է մտել 2002 թվականի հունիսի 26-ից: