Հ Ա Մ Ա Ձ Ա Յ Ն Ա Գ Ի Ր

Հայաստանի Հանրապետության Կառավարության ԵՎ Տաջիկստանի Հանրապետության Կառավարության միջԵՎ երիտասարդության հետ աշխատանքի ԵՎ սպորտի բնագավառում համագործակցության մասին

Հայաստանի Հանրապետության Կառավարությունը և Տաջիկստանի Հանրապետության Կառավարությունը, այսուհետև՝ Կողմեր,

հաստատելով ավանդական բարեկամական կապերն ամրապնդելու իրենց մտադրությունը և ցանկանալով զարգացնել կապերը երկու պետությունների ժողովուրդների միջև,

համոզված լինելով, որ երիտասարդության հարցերով քաղաքականության և սպորտի բնագավառում փոխադարձ սերտ կապերի ստեղծումն ու համագործակցությունը նպաստում են երիտասարդ սերնդի ներկայացուցիչների միջև եղբայրական հարաբերությունների ամրապնդմանն ու ծառայում են նրանց միջև փոխըմբռնման խորացմանը,

համաձայնեցին ներքոնշյալի մասին.

Հոդված 1

Կողմերը համակողմանիորեն կօժանդակեն երիտասարդական կապերի ամրապնդմանն ու զարգացմանը պետական կառույցների, իրենց պետություններում գրանցված երիտասարդական հասարակական կազմակերպությունների միջոցով:

Հոդված 2

 Կողմերը կաջակցեն մարզական կազմակերպությունների միջև համագործակցությանը, նրանց մասնակցությանը երկու պետություններում անցկացվող մարզական միջոցառումներին:

Հոդված 3

Կողմերը, իրենց պետությունների ազգային օրենսդրությանը համապատասխան, կնպաստեն երիտասարդության և սպորտի բնագավառում կապերի զարգացմանը և համագործակցությանը՝

ա) երիտասարդության և սպորտի բնագավառում գործունեություն իրականացնող հաստատությունների ու կազմակերպությունների միջև համագործակցության համար պայմանների ստեղծման, կապերի հաստատման և փոխանակման միջոցով.

բ) համատեղ միջոցառումների անցկացման և դրանում աջակցություն ցուցաբերելու համար մյուս Կողմի հնարավորությունների և պայմանների ուսումնասիրման միջոցով.

գ) Կողմերի պետությունների երիտասարդական և մարզական շարժումների վիճակի և զարգացման վերաբերյալ տեղեկության փոխանակման միջոցով:

Հոդված 4

 Կողմերը կնպաստեն երիտասարդության և սպորտի խնդիրներով զբաղվող հետազոտական կազմակերպությունների կամ կենտրոնների միջև անմիջական կապերի զարգացմանը՝ ներառյալ իրենց հետաքրքրող հարցերով փոխանակմանը:

Հոդված 5

 Կողմերը, իրենց պետությունների ազգային օրենսդրությանը համապատասխան, կաջակցեն մարզական սարքավորումների և գույքի արտադրման բնագավառում համագործակցությանը, մարզական կառույցների նախագծմանը, կառուցմանը, վերականգնմանն ու շահագործմանը, կստեղծեն պայմաններ մրցումների և ուսումնամարզական հավաքների անցկացման համար:

Հոդված 6

Կողմերը կաջակցեն սույն Համաձայնագրի շրջանակներում անց կացվող փառատոներին, համաժողովներին, գիտաժողովներին, սեմինարներին, մրցույթներին, ցուցահանդեսներին, հանդիպումներին, ֆորումներին և մրցաշարերին մասնակցությանը:

Հոդված 7

 Կողմերը, նախապես ստացված տեղեկությանը համապատասխան, կցուցաբերեն ցանկացած աջակցություն իրենց պետությունների տարածքում գտնվող կազմակերպված երիտասարդական և մարզական խմբերին, առանձին պաշտոնական ներկայացուցիչներին:

Հոդված 8

 Կողմերի ներկայացուցիչները կկարողանան ամեն տարի հաջորդաբար հանդիպել ք.Երևանում և ք.Դուշանբեում` սույն Համաձայնագրի իրագործման ընթացքը քննարկելու և յուրաքանչյուր հաջորդ տարվա միջոցառումների ծրագիրը համատեղ մշակելու համար:

Հոդված 9

Կողմերի կողմից սույն Համաձայնագրի իրագործմանն ուղղված միջոցառումների իրականացման ֆինանսավորումը կկատարվի Կողմերի պետությունների համապատասխան գերատեսչությունների, հիմնարկների և կազմակերպությունների բյուջետային այն միջոցների շրջանակներում, որոնք նախատեսված են իրենց գործառույթների իրականացման համար:

Հոդված 10

 Սույն Համաձայնագրի կիրառման և մեկնաբանման ընթացքում առաջացող վիճելի հարցերը լուծվում են Կողմերի միջև՝ խորհրդակցությունների և բանակցությունների միջոցով:

Հոդված 11

Սույն Համաձայնագրի իրականացման համար իրավասու մարմիններն են՝

 Հայաստանի Հանրապետության կողմից՝ Հայաստանի Հանրապետության սպորտի և երիտասարդության հարցերի նախարարությունը,

 Տաջիկստանի Հանրապետության կողմից՝ Տաջիկստանի Հանրապետության Կառավարությանն առընթեր երիտասարդության հարցերի, սպորտի և զբոսաշրջության կոմիտեն:

Հոդված 12

 Սույն Համաձայնագիրը չի շոշափում Կողմերի այն իրավունքներն ու պարտավորությունները, որոնք բխում են Կողմերի պետությունների մասնակցությամբ այլ միջազգային պայմանագրերից:

Հոդված 13

 Կողմերի փոխադարձ համաձայնությամբ սույն Համաձայնագրում կարող են կատարվել փոփոխություններ և լրացումներ, որոնք ձևակերպվում են սույն Համաձայնագրի անբաժանելի մաս կազմող առանձին արձանագրություններով:

Հոդված 14

Սույն Համաձայնագիրն ուժի մեջ է մտնում Կողմերի կողմից դրա ուժի մեջ մտնելու համար անհրաժեշտ ներպետական ընթացակարգերի կատարման մասին վերջին գրավոր ծանուցումը դիվանագիտական ուղիներով ստանալու օրվանից: Համաձայնագիրը գործելու է 5 (հինգ) տարվա ընթացքում և ինքնաբերաբար կերկարաձգվի հաջորդ հնգամյա ժամկետներով, եթե Կողմերից մեկը համապատասխան ժամկետը լրանալուց ոչ ուշ, քան 6 (վեց) ամիս առաջ, մյուս Կողմին գրավոր չծանուցի սույն Համաձայնագրի գործողությունը դադարեցնելու իր մտադրության մասին:

Կատարված է Երևան քաղաքում 2017 թվականի հունիսի 14-ին, երկու բնօրինակով, յուրաքանչյուրը՝ հայերեն, տաջիկերեն և ռուսերեն, ընդ որում՝ բոլոր տեքստերը հավասարազոր են:

Սույն Համաձայնագրի դրույթների մեկնաբանման տարաձայնությունների դեպքում հիմք կընդունվի ռուսերեն տեքստը:

Համաձայնագիրն ուժի մեջ է մտել 2018թ. հունվարի 10-ին