«Գրանցված է»

ՀՀ արդարադատության

նախարարության կողմից

30 նոյեմբերի 2007 թ.

Պետական գրանցման թիվ 11607418

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ տրանսպորտի ԵՎ կապի նախարար

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ոստիկանության պետ

30 հոկտեմբերի 2007 թ. ք. Երևան

N 481-Ն

8 նոյեմբերի 2007 թ. ք. Երևան

N 4-Ն

Հ Ա Մ Ա Տ Ե Ղ  Հ Ր Ա Մ Ա Ն

ԻՆՔՆԱՇԵՆ ԱՎՏՈՄՈԲԻԼՆԵՐԻՆ, ԿՑՈՐԴՆԵՐԻՆ ԵՎ ՄՈՏՈՑԻԿԼԵՏՆԵՐԻՆ ՆԵՐԿԱՅԱՑՎՈՂ ՏԵԽՆԻԿԱԿԱՆ ՊԱՀԱՆՋՆԵՐԻ ՄԱՍԻՆ

Համաձայն Հայաստանի Հանրապետության կառավարության 2006 թվականի նոյեմբերի 30-ի «Տրանսպորտային միջոցների պետական հաշվառման կարգը հաստատելու մասին» թիվ 1853-Ն որոշման 4-րդ կետի.

Հաստատել`

Ինքնաշեն ավտոմոբիլներին, կցորդներին և մոտոցիկլետներին ներկայացվող տեխնիկական պահանջները` համաձայն հավելվածի:

ՀՀ տրանսպորտի և կապի նախարար`

Ա. Մանուկյան

ՀՀ ոստիկանության պետ, ոստիկանության գեներալ-գնդապետ`

Հ. Հարությունյան

Հավելված ՀՀ տրանսպորտի և կապի նախարարի 30.10.2007 թ. N 481-Ն ՀՀ ոստիկանության պետի 08.11.2007 թ. N 4-Ն համատեղ հրամանի

ԻՆՔՆԱՇԵՆ ԱՎՏՈՄՈԲԻԼՆԵՐԻՆ, ԿՑՈՐԴՆԵՐԻՆ ԵՎ ՄՈՏՈՑԻԿԼԵՏՆԵՐԻՆ ՆԵՐԿԱՅԱՑՎՈՂ ՏԵԽՆԻԿԱԿԱՆ ՊԱՀԱՆՋՆԵՐԸ

Գ Լ ՈՒ Խ  1

ԸՆԴՀԱՆՈՒՐ ԴՐՈՒՅԹՆԵՐ

1. Ինքնաշեն ավտոմոբիլներին, կցորդներին և մոտոցիկլետներին ներկայացվող տեխնիկական պահանջները (այսուհետ` տեխնիկական պահանջներ) տարածվում են անհատական (կոլեկտիվ) կարգով նախագծված և պատրաստված թեթև մարդատար ավտոմոբիլների, դրանց կցորդների և մոտոցիկլետների վրա:

2. Տեխնիկական պահանջները տարածվում են այն ինքնաշեն պատրաստված թեթև մարդատար ավտոմոբիլների վրա, որոնց թափքը գործարանային արտադրության չէ:

3. Տեխնիկական պահանջները տարածվում են այն ինքնաշեն պատրաստված կցորդների վրա, որոնց զանգվածի զգալի մասը կրում է քարշիչ ավտոմոբիլի կցաքարշակային սարքը, որը պետք է լինի գործարանային արտադրության:

4. Տեխնիկական պահանջները տարածվում են այն ինքնաշեն պատրաստված մոտոցիկլետների վրա, որոնց ամրաշրջանակը գործարանային արտադրության չէ:

5. Ինքնաշեն տրանսպորտային միջոցը անհրաժեշտ է նախագծել և կառուցել հաշվի առնելով Հայաստանի Հանրապետության կառավարության 2007 թվականի հունիսի 28-ի «Հայաստանի Հանրապետության ճանապարհային երթևեկության կանոնները և տրանսպորտային միջոցների շահագործումն արգելող անսարքությունների և պայմանների ցանկը հաստատելու մասին» N 955-Ն որոշմամբ հաստատված «Տրանսպորտային միջոցների շահագործումն արգելող անսարքությունների և պայմանների» ցանկի պահանջները:

6. Տեխնիկական պահանջներում օգտագործված հասկացությունները ունեն «Ճանապարհային երթևեկության անվտանգության ապահովման մասին» Հայաստանի Հանրապետության օրենքում բերված նշանակությունը:

Գ Լ ՈՒ Խ  2

ԻՆՔՆԱՇԵՆ ԱՎՏՈՄՈԲԻԼՆԵՐԻ ԸՆԴՀԱՆՈՒՐ ՏՎՅԱԼՆԵՐԸ, ՀԱՐՄԱՐԱԿԱԶՄՈՒԹՅՈՒՆԸ, ՀԻՄՆԱԿԱՆ ՉԱՓԵՐԸ, ՏԵԽՆԻԿԱՇԱՀԱԳՈՐԾԱԿԱՆ ՀԱՏԿԱՆԻՇՆԵՐԸ ԵՎ ԴՐԱՆՑ ԱՌԱՆՁԻՆ ԱԳՐԵԳԱՏՆԵՐԻՆ, ՀԱՆԳՈՒՅՑՆԵՐԻՆ, ՄԱՍԵՐԻՆ, ՍԱՐՔԵՐԻՆ ԵՎ ՍԱՐՔԱՎՈՐՈՒՄՆԵՐԻՆ ՆԵՐԿԱՅԱՑՎՈՂ ՊԱՀԱՆՋՆԵՐԸ

7. Ինքնաշեն ավտոմոբիլը պետք է լինի երկսռնիանոց, չորս անիվներով: Այն կարող է ունենալ հինգից ոչ ավելի նստատեղ (վագոնային հարմարակազմությամբ ավտոմոբիլները` յոթից ոչ ավելի), ընդ որում՝ օգտագործելով գործարանային արտադրության թեթև մարդատար ավտոմոբիլների (բացի թափքից) և մոտոցիկլետների ագրեգատներ, հանգույցներ և դետալներ:

8. Կարող է կիրառվել հարմարակազմման ցանկացած տեսակի սխեմա: Ինքնաշեն նախագծված և պատրաստված ավտոմոբիլը պետք է լինի ինքնատիպ և չհանդիսանա գործարանային արտադրության ավտոմոբիլի կրկնօրինակ: Ինքնաշեն ավտոմոբիլի կառուցման համար կարող է որպես բազա օգտագործվել հին ավտոմոբիլ, որը հանված է պետական հաշվառումից՝ միաժամանակ բավարարելով թափքի լրիվ ընթացային մասը չօգտագործելու պահանջը:

9. Ինքնաշեն ավտոմոբիլը պետք է ունենա հետևյալ հիմնական չափերը`

1) երկարությունը` ոչ ավելի, քան 4700մմ,

2) լայնությունը` ոչ ավելի, քան 1800մմ,

3) միջառանցքային հեռավորությունը` 1000մմ-ից ոչ պակաս,

4) միջանվահետքային հեռավորությունը` 1100մմ-ից ոչ պակաս,

5) վագոնային հարմարակազմման դեպքում հատակի բարձրությունը ճանապարհի հարթությունից` ոչ ավելի, քան 500մմ,

6) ընդհանուր բարձրությունը` ոչ ավելի քան 1900մմ, միևնույն ժամանակ կարելի է պատրաստել տեղաշարժվող տանիքով ավտոմոբիլ, որի բարձրությունը տրանսպորտային վիճակում չի անցնում ավտոմոբիլի 1900մմ եզրաչափքից:

10. Վագոնային հարմարակազմմամբ ինքնաշեն ավտոմոբիլը պետք է սարքավորված լինի էներգակլանող թափարգելով, ինչպես նաև անվտանգության մետաղական աղեղներով, որոնց արտաքին տրամագիծը պետք է լինի 50մմ-ից ավելի:

11. Ինքնաշեն ավտոմոբիլի թույլատրելի առավելագույն զանգվածի մեկ տոննային ընկնող շարժիչի տեսակարար հզորությունը պետք է կազմի 24 ձիաուժից ոչ պակաս և 50 ձիաուժից ոչ ավելի: Ավտոմոբիլի թույլատրելի առավելագույն զանգվածը հավասար է լրիվ լիցքավորված և լրակազմված ավտոմոբիլի զանգվածին գումարած ուղևորների և ուղեբեռի զանգվածները: Մեկ ուղևորի քաշն ընդունվում է 80 (70կգ+10կգ ուղեբեռ) կիլոգրամ:

12. Ըստ առջևի արտաքին անվի հետքի առանցքի, ինքնաշեն ավտոմոբիլի շրջադարձի նվազագույն շառավիղը պետք է լինի 5,6 մ, իսկ շրջադարձի արտաքին եզրաչափային շառավիղը` 6,2մ:

13. Ինքնաշեն ավտոմոբիլը չոր ասֆալտապատ հարթակի վրա 50մ տրամագիծ ունեցող շրջանով և 30կմ/ժ արագությամբ պետք է շարժվի կայուն, առանց կողասահքի երևույթի:

14.Ճանապարհի հարթությունից մինչև լրիվ բեռնված ինքնաշեն ավտոմոբիլի ամենացածր կետի հեռավորությունը պետք է լինի ոչ պակաս, քան 150մմ-ը:

15. Թափքի հարմարակազմումը, կառուցվածքը, ինչպես նաև ղեկանիվը, լծակները, ոտնակները, փոխարկիչները և ղեկավարման սարքերի կոճակները պետք է ապահովեն ուղևորների նստեցման և ավտոմոբիլի կառավարման հարմարավետությունը, ինչպես նաև վարորդների և ուղևորների պահպանումը վնասվածքներից: Վարորդի նստատեղից ավտոմոբիլի դիմացի ճանապարհային գոտու ոչ տեսանելի հատվածը պետք է չգերազանցի 6մ-ը:

16. Ինքնաշեն ավտոմոբիլը պետք է կահավորված լինի գործարանային արտադրության ավտոմոբիլների արգելակային և ղեկային (ձախակողմյան) կառավարման համակարգերով: Կարելի է օգտագործել ինքնաշեն առջևի կախոց: 800կգ թույլատրելի առավելագույն զանգվածը և 75կմ/ժ առավելագույն արագությունը գերազանցող ինքնաշեն ավտոմոբիլի վրա չի կարող կիրառվել 10:1-ի և ավելի փոքր փոխանցումային թվով ղեկային կառավարման համակարգ:

17. Չոր ասֆալտապատ ծածկույթի վրա կանգնած լրիվ բեռնված ինքնաշեն ավտոմոբիլի անիվների դարձի դեպքում ղեկանիվի օղագոտին շոշափող ճիգը չպետք է գերազանցի 20կգ/ուժ-ը:

18. Ինքնաշեն ավտոմոբիլը պետք է ունենա երկու իրարից անկախ արգելակման համակարգ`

1) Բանվորական` ոտնակից սռնիներով առանձնացված հաղորդակով,

2) Կայանման` լծակի շարժաբերից, որը կատարում է նաև պահուստային դեր,

3) Կարելի է կիրառել նաև առջևի անիվների վրա ներգործումով կայանման արգելակային համակարգ:

19. Լրակազմված և լիցքավորված զանգվածը 450կգ-ը գերազանցելու դեպքում ավտոմոբիլը պետք է ունենա հետին ընթացքի փոխանցում:

20. Կարող են պատրաստվել հետևյալ կառուցվածքի թափքեր` փակ, բաց և փափուկ հավաքվող ծածկույթով:

1) Թափքի ոչ մետաղական մասերը պետք է հեռացված լինեն տաքացող մասերից 100մմ-ից ոչ պակաս, իսկ ավելի մոտ գտնվելու դեպքում պաշտպանված լինեն ջերմամեկուսիչ նյութով: Թափքի արտաքին տեսքը պետք է լինի կոկիկ:

2) Վահանակի արտաքին մակերևույթների ցցուն մասերը, թափքի դետալները և դրանց լծորդումների կորացման շառավիղները պետք է չգերազանցեն 2,5մմ-ը:

3) Կարելի է կիրառել թափքի վահանակի արտաքին մակերևույթի վրա տեղադրված դետալների ցցվածություն`

ա. դեկորատիվ ցանցերի վրադիրների մակարդակը 10մմ-ից ոչ ավելի,

բ. դռների և շարժիչի, բեռնախցիկի ծածկոցների ծխնիների համար 30մմ-ից ոչ ավելի,

գ. արտաքին բռնակների և դռների փականների կոճակների համար 40մմ-ից ոչ ավելի,

դ. լապտերների եզրակների և ցվիքների համար 30մմ-ից ոչ ավելի՝ այդ թվում լուսացրիչի մակերևույթի համեմատ:

4) Թափարգելի դետալների կորության շառավիղը պետք է լինի 5 մմ-ից ոչ պակաս, դրա ծայրերը պետք է թեքված լինեն դեպի թափքի արտաքին մակերևույթը և դրանց միջև եղած բացակը չպետք է գերազանցի 2 մմ-ը:

5) Սարքերի վահանակի ստորին եզրերը պետք է ունենան 10մմ-ից ոչ պակաս կորացման շառավիղ:

6) Թափքը պետք է սարքավորված լինի հակաարևային հովհարներով և հետին տեսանելիության հայելիներով:

7) Դռները, շարժիչի և բեռնախցիկի ծածկոցները պետք է սարքավորված լինեն փականներով: Կարելի է կիրառել բացվող, տեղաշարժվող, հավաքվող և այլ դռների ցանկացած հարմարակազմում:

8) Վարորդի ձախակողմյան ապակին պետք է լինի իջեցվող կամ տեղաշարժվող:

21. Վառելանյութի բաքը պետք է լինի գործարանային արտադրության ավտոմոբիլի և տեղադրված լինի ավտոմոբիլի բազայի ներսում ուղևորասրահից մեկուսացված:

22. Ինքնաշեն ավտոմոբիլը սարքավորվում է գործարանային արտադրության ավտոմոբիլի արտաքին լուսավորման և լուսաազդանշանային սարքերով:

23. Ինքնաշեն ավտոմոբիլը պետք է կահավորված լինի գործարանային արտադրության ավտոմոբիլների ապակեմաքրիչներով, ինչպես նաև վազքաչափով, վառոցքի փականքով, լուսավորության և շրջադարձի թարթիչների փոխարկիչներով, շրջադարձի ցուցիչների ցուցասարքով:

24. Ինքնաշեն ավտոմոբիլների վրա պետք է նախատեսված լինի հաշվառման համարանիշների տեղեր` ըստ Հայաստանի Հանրապետության կառավարության 27 հուլիսի 2006 թվականի «Տրանսպորտային միջոցների հաշվառման համարանիշներին ներկայացվող պահանջները սահմանելու մասին» N 1400-Ն որոշման:

Գ Լ ՈՒ Խ  3

ԻՆՔՆԱՇԵՆ ԿՑՈՐԴՆԵՐԻ ՊԱՐԱՄԵՏՐԵՐԸ, ՉԱՓԵՐԸ ԵՎ ԴՐԱՆՑ ՆԵՐԿԱՅԱՑՎՈՂ ՏԵԽՆԻԿԱԿԱՆ ՊԱՀԱՆՋՆԵՐԸ

25. Արգելակային համակարգ չունեցող ինքնաշեն կցորդի թույլատրելի առավելագույն զանգվածը չպետք է գերազանցի քարշիչ ավտոմոբիլը թողարկող գործարանի կողմից թույլատրելի զանգվածը և պետք է լինի լրակազմված և լիցքավորված քարշիչ ավտոմոբիլի զանգվածի կեսից պակաս, իսկ արգելակային համակարգով կահավորված կցորդի թույլատրելի առավելագույն զանգվածը չպետք է գերազանցի լրակազմված և լիցքավորված քարշիչ ավտոմոբիլի զանգվածը կամ գերազանցի 750կգ-ը:

26. Ինքնաշեն կցորդի ցանկացած կշռային վիճակի դեպքում կցման հարմարանքի գնդիկավոր հոդակապի կենտրոնում ուղղաձիգ ստատիկ բեռնվածքը պետք է համապատասխանի քարշիչ ավտոմոբիլ արտադրող գործարանի կողմից թույլատրված մեծությանը և պետք է լինի 240Ն (25կգուժ)–ից մինչև 490Ն (50կգուժ):

27. Ինքնաշեն կցորդի կառուցվածքը պետք է հնարավորություն տա երթևեկելու ավտոգնացքի կազմում, քարշիչ ավտոմոբիլը արտադրող գործարանի կողմից նախատեսված առավելագույն արագությամբ:

28. Ինքնաշեն կցորդը պետք է ունենա հետևյալ հիմնական չափերը.

1) Երկարությունը` ոչ ավելի, քան 3000մմ,

2) Լայնությունը` ոչ ավելի, քան 1800մմ,

3) Բարձրությունը` ոչ ավելի, քան 1200մմ:

29. Բեռնված ինքնաշեն կցորդի ծանրության կենտրոնը պետք է տեղակայված լինի այնպես, որ ծանրության կենտրոնի բարձրությունը չպետք է գերազանցի 800մմ-ը:

30. Ինքնաշեն կցորդի ճանապարհային բացակը պետք է լինի քարշիչ ավտոմոբիլի ճանապարհային բացակից ոչ պակաս:

31. Ընդհանուր պահանջներ.

1) Ինքնաշեն կցորդը պետք է լինի միասռնի,

2) Հորիզոնական հարթության վրա տեղակայված, հորիզոնական տեղաբաշխմամբ ներքին հատակով ինքնաշեն կցորդը մեկ կողմի դողի վրա պետք է ունենա իր թույլատրելի առավելագույն զանգվածի 55%-ից ոչ ավելի բեռնվածք,

3) Ինքնաշեն կցորդի առեղի (շրջանակի) կառուցվածքը և չափերը պետք է ապահովեն դրա շեղումը գնդի նկատմամբ,

4) Ինքնաշեն կցորդը պետք է սարքավորված լինի երկու չհանվող ապահովիչ շղթաներով (մետաղաճոպաններով), որոնք կցաքարշակային սարքի վթարային կտրման դեպքում թույլ չեն տա առեղի հպումը ճանապարհի մակերևույթին, ապահովելով միևնույն ժամանակ կցորդի կառավարումը,

5) Ինքնաշեն կցորդը պետք է ունենա երկու հակագլորման հենք (ցցակալ),

6) Ինքնաշեն կցորդը պետք է ունենա կցաքարշակային սարք.

ա. կցաքարշակային սարքը պետք է ներառի ավտոմոբիլի վրա տեղակայված գնդաձև մատը և կցորդի առեղի վրա ամրացված փականային հարմարանքը,

բ. ավտոմոբիլի վրա գնդաձև մատի և կցորդի վրա փականային հարմարանքի ամրացումները պետք է ապահովեն դրանց փոխարինումը,

գ. փականային սարքի երկայնական առանցքը պետք է գտնվի ինքնաշեն կցորդի ուղղահայաց երկայնական սիմետրիայի հարթության մեջ,

դ. փականային սարքը պետք է ապահովված լինի ինքնակամ արձակումից երկու իրարից անկախ գործող ապահովիչների միջոցով, որոնցից յուրաքանչյուրը բացառում է շարժման ընթացքում դրանցից որևէ մեկի շարքից դուրս գալու դեպքում ինքնաանջատման հնարավորությունը:

7) Ինքնաշեն կցորդը պետք է ունենա ամբարձիկի տեղակայման համար տեղեր:

8) Ինքնաշեն կցորդների վրա պետք է նախատեսված լինի հաշվառման համարանիշների տեղեր` ըստ Հայաստանի Հանրապետության կառավարության 27 հուլիսի 2006 թվականի «Տրանսպորտային միջոցների հաշվառման համարանիշներին ներկայացվող պահանջները սահմանելու մասին» N 1400-Ն որոշման:

32. Ինքնաշեն կցորդի կայանման արգելակային համակարգի ղեկավարման լծակը պետք է տեղակայված լինի առեղի (շրջանակի) աջ կողմում:

33. Ինքնաշեն կցորդը պետք է կահավորված լինի հետին պաշտպանիչ հարմարանքով, ցեխապաշտպան գոգնոցներով և ցայտապաշտպանիչներով:

Գ Լ ՈՒ Խ  4

ԻՆՔՆԱՇԵՆ ՄՈՏՈՑԻԿԼԵՏՆԵՐԻ ԸՆԴՀԱՆՈՒՐ ՏՎՅԱԼՆԵՐԸ, ՀԱՐՄԱՐԱԿԱԶՄՈՒԹՅՈՒՆԸ, ՀԻՄՆԱԿԱՆ ՉԱՓԵՐԸ, ՏԵԽՆԻԿԱՇԱՀԱԳՈՐԾԱԿԱՆ ՀԱՏԿԱՆԻՇՆԵՐԸ ԵՎ ԴՐԱՆՑ ԿԱՌՈՒՑՎԱԾՔԻՆ ՆԵՐԿԱՅԱՑՎՈՂ ՊԱՀԱՆՋՆԵՐԸ

34. Թույլատրվում է կառուցել երկանիվ և եռանիվ մոտոցիկլետներ` նստատեղերի հետևյալ քանակով.

1) երկանիվ` ոչ ավելի երկու նստատեղից,

2) եռանիվ՝ ոչ ավելի երեք նստատեղից:

35. Ինքնաշեն մոտոցիկլետների վրա կարող են օգտագործվել ցանկացած տեսակի շարժաբերների սխեմաների հարմարակազմում, որը կապահովի դրա շահագործման հուսալիությունն ու անվտանգությունը:

36. Ինքնաշեն մոտոցիկլետը պետք է ունենա հետևյալ հիմնական չափերը.

1) երկարությունը` ոչ ավելի, քան 2450 մմ,

2) երկանիվի լայնությունը` ոչ ավելի, քան 900մմ,

3) եռանիվի լայնությունը` ոչ ավելի, քան 1700մմ,

4) բարձրությունը ճանապարհի հարթությունից առանց բեռնվածության և առանց շրջահոսիչի՝ ոչ ավելի, քան 1300մմ,

5) բարձրությունը ճանապարհի հարթությունից շրջահոսիչի առկայության դեպքում՝ ոչ ավելի քան 1700մմ,

6) անվային բազան` ոչ պակաս, քան 1000մմ,

7) եռանիվի միջանվային հեռավորությունը` ոչ ավելի, քան 1200մմ,

8) ճանապարհի հարթությունից մինչև լրիվ բեռնված մոտոցիկլետների ամենացածր կետի հեռավորությունը` ոչ պակաս, քան 100մմ:

37. Երկանիվ ինքնաշեն մոտոցիկլետների թույլատրելի առավելագույն զանգվածը շարժիչի բանվորական ծավալի մինչև 750սմ³-ի դեպքում կողային կցորդի չոր զանգվածը (կցորդի զանգվածը առանց լրակազմված և լիցքավորված վիճակի) չպետք է գերազանցի 123կգ-ը, իսկ կողային կցորդի թույլատրելի առավելագույն զանգվածը (կցորդի չոր զանգվածին գումարած մեկ ուղևորի քաշը` 70կգ, գումարած ուղեբեռի քաշը, որը չպետք է գերզանցի 45կգ-ը) չպետք է գերազանցի 230կգ-ը:

38. Ինքնաշեն մոտոցիկլետի վրա պետք է տեղադրված լինի գործարանային արտադրության մոտոցիկլետի շարժիչ:

39. Ինքնաշեն մոտոցիկլետի թույլատրելի առավելագույն զանգվածի մեկ տոննային ընկնող` շարժիչի տեսակարար հզորությունը պետք է լինի 12 ձիաուժից մինչև 60 ձիաուժ (թույլատրելի առավելագույն զանգվածը հավասար է մոտոցիկլետի լրակազմված և լիցքավորված զանգվածին գումարած վարորդի, ուղևորների և ուղեբեռի քաշը): Մեկ մարդու քաշն ընդունվում է 70կգ:

40. Եռանիվ ինքնաշեն մոտոցիկլետի շրջադարձի եզրաչափքային շառավիղը չպետք է գերազանցի 3,5մ-ը, իսկ դրանց ամենափոքր շրջադարձի շառավիղը` 2,2 մ-ը:

41. Երկանիվ ինքնաշեն մոտոցիկլետի շրջադարձի եզրաչափքային շառավիղը չպետք է գերազանցի 3,5մ-ը:

42. 40մ շառավիղ ունեցող շրջանով, 30կմ/ժ արագությամբ չոր ասֆալտապատ հարթակով շարժվելու ժամանակ ցանկացած տարբերակի թուլատրելի բեռնվածության դեպքում ինքնաշեն մոտոցիկլետը պետք է լինի կայուն, դրա մոտ չպետք է նկատվի կողասահքի երևույթ, իսկ կողային կցորդով մոտոցիկլետի դեպքում (հատկապես կողային կցորդի կողմը շրջադարձ կատարելիս)` այն չպետք է շրջվի:

43. Վարորդի նստատեղից ինքնաշեն մոտոցիկլետի առջևի ճանապարհի չդիտվող գոտին չպետք է գերազանցի 3 մ-ը:

44. Ինքնաշեն մոտոցիկլետը պետք է սարքավորված լինի արգելակներով, ղեկային կառավարմամբ և կախոցների համակարգով:

45. Ինքնաշեն մոտոցիկլետը պետք է կահավորված լինի շրջահոսիչով կամ հողմապակիով:

1) Ինքնաշեն մոտոցիկլետը կողային մակերևույթների վրա պետք է ունենա բավարար բացվածք, որով վարորդը և ուղևորը վթարային իրավիճակների առաջացման դեպքում կարողանան լքել այն:

2) Փակ տեսակի շրջահոսիչով երկանիվ ինքնաշեն մոտոցիկլետը 7կմ/ժ և ավելի ցածր արագությամբ շարժվելու դեպքում ստատիկ հավասարակշռությունն պահպանելու համար պետք է ունենա կայունացման և ղեկավարելիության կորուստը կանխող հարմարանք:

3) Շրջահոսիչի ոչ մետաղական մասերը պետք է հեռացված լինեն տաքացող մասերից 20մմ-ից ոչ պակաս, իսկ ավելի մոտ գտնվելու դեպքում պաշտպանված լինեն ջերմամեկուսիչ նյութով:

4) Արտաքին մակերևույթի ելուստային մասերի, շրջահոսիչի դետալների կցորդման տեղերը պետք է ունենան 3մմ-ից ոչ պակաս կորացման շառավղեր:

5) Ինքնաշեն մոտոցիկլետի շարժման ժամանակ շրջահոսիչի բացվող դետալների (կափարիչները, բեռնատեղերը և այլն) հուսալի սևեռումն ապահովելու համար դրանք պետք է սարքավորված լինեն փականներով:

46. Ինքնաշեն մոտոցիկլետների վրա պետք է նախատեսված լինեն հաշվառման համարանիշների տեղեր` ըստ Հայաստանի Հանրապետության կառավարության 27 հուլիսի 2006 թվականի «Տրանսպորտային միջոցների հաշվառման համարանիշներին ներկայացվող պահանջները սահմանելու մասին» N 1400-Ն որոշման: