Հ Ա Մ Ա Ձ Ա Յ Ն Ա Գ Ի Ր

Երևան (Հայաստանի Հանրապետություն) և Աշխաբադ (Թուրքմենստան) քաղաքների միջև բարեկամության և համագործակցության հարաբերությունների հաստատման մասին

Երևանի քաղաքապետարանը (Հայաստանի Հանրապետություն) և Աշխաբադ քաղաքի Խյակիմլիկը (Թուրքմենստան)՝ այսուհետ` Կողմեր,

հաշվի առնելով Երևանի և Աշխաբադի միջև բարեկամական կապեր հաստատելու փոխադարձ ցանկությունը,

հաշվի առնելով տնտեսական, հումանիտար և մշակութային համագործակցության ընդլայնման հարցում փոխադարձ շահագրգռվածությունը,

համաձայնեցին ներքոհիշյալի մասին՝

 Հոդված 1

Սույն Համաձայնագիրը համագործակցության հարաբերություններ է հաստատում Երևան և Աշխաբադ քաղաքների միջև:

Հոդված 2

Կողմերն իրենց իրավասության շրջանակներում, Հայաստանի Հանրապետության և Թուրքմենստանի նորմատիվ իրավական ակտերին համապատասխան կիրականացնեն համագործակցություն՝ իրավահավասարության, փոխշահավետության, հարգանքի և վստահության սկզբունքների հիման վրա:

Հոդված 3

Կողմերը կհամագործակցեն հետևյալ ուղղություններով՝

- առևտրատնտեսական ոլորտում,

- կրթության ոլորտում,

- մշակույթի ոլորտում,

- զբոսաշրջության ոլորտում,

- երիտասարդական քաղաքականության, ֆիզիկական կուլտուրայի և սպորտի ոլորտում:

Հոդված 4

Տեղական ինքնակառավարման մարմինների միջև համագործակցության ընթացքում Կողմերը՝

- կաջակցեն Կողմերի պաշտոնական պատվիրակությունների փոխանակման կազմակերպմանը` տեղական ինքնակառավարման մարմինների աշխատանքային փորձն ուսումնասիրելու նպատակով,

- տեղեկատվություն կփոխանակեն քաղաքային կայուն զարգացման, ինովացիոն տեխնոլոգիաների կիրառման ոլորտներում լավագույն փորձերի վերաբերյալ,

- կիրականացնեն Կողմերի պատմության, մշակույթի, ավանդույթների հետ ծանոթացմանն ուղղված գործունեություն:

Հոդված 5

Առևտրատնտեսական ոլորտում համագործակցության շրջանակներում Կողմերը՝

- կաջակցեն առևտրատնտեսական համագործակցության ընդլայնմանը, տնտեսվարող սուբյեկտների համատեղ ձեռնարկատիրական և ներդրումային գործունեության համար պայմանների ապահովմանը,

- կխրախուսեն ցանկացած կազմակերպաիրավական ձևի տնտեսվարող սուբյեկտների միջև անմիջական կապերը: Մատակարարվող ապրանքների և ծառայությունների ծավալները, անվանացանկը, գները, փոխադարձ հաշվարկների պայմանները և կարգը, ինչպես նաև պատասխանատվությունը ստանձնած պարտավորությունների նկատմամբ տնտեսվարող սուբյեկտների միջև պայմանագրերի առարկա են:

Հոդված 6

Կրթության ոլորտում համագործակցության շրջանակներում Կողմերը կիրականացնեն մանկավարժների և սովորողների խմբերի փոխանակումներ՝ Կողմերի հանրակրթական հաստատություններում ուսումնադաստիարակչական աշխատանքի կազմակերպման փորձի ուսումնասիրության, դասավանդման մեթոդների կատարելագործման և պատմական ու մշակութային արժեքների հետ ծանոթանալու համար:

Հոդված 7

Մշակույթի ոլորտում համագործակցության շրջանակներում Կողմերը՝

- կաջակցեն ստեղծագործական խմբերի և մշակութային գործիչների մասնակցությանը Երևան և Աշխաբադ քաղաքների Օրերի տոնակատարությունների շրջանակներում ազգային մշակույթների փառատոնին,

- կիրականացնեն գեղարվեստական դպրոցների սովորողների աշխատանքների ցուցահանդեսների, մշակութային միջոցառումների վերաբերյալ տեսա- և ֆոտոնյութերի փոխանակում Երևանում և Աշխաբադում,

- կաջակցեն Երևան և Աշխաբադ քաղաքների գրադարանների միջև համագործակցության հաստատմանը:

Հոդված 8

Զբոսաշրջության ոլորտում համագործակցության շրջանակներում Կողմերը՝

- կձևավորեն հնարավոր զբոսաշրջային ուղղություններ Երևան և Աշխաբադ քաղաքների միջև,

- կկազմակերպեն ճանաչողական շրջայցեր զբոսաշրջային ընկերությունների և հյուրանոցային բիզնեսի ներկայացուցիչների համար:

Հոդված 9

Երիտասարդական քաղաքականության, ֆիզիկական կուլտուրայի և սպորտի ոլորտում համագործակցության շրջանակներում Կողմերը՝

- կնպաստեն Երևան և Աշխաբադ քաղաքների սպորտային կազմակերպությունների միջև կապերի հաստատմանը,

- կկազմակերպեն Երևան և Աշխաբադ քաղաքների երիտասարդների սպորտային միջոցառումներին պատանի մարզիկների թիմերի մասնակցությունը:

Հոդված 10

Սույն Համաձայնագրի իրականացման, ինչպես նաև ստանձնած պարտավորությունների վերահսկողության նպատակով կարող են իրականացվել երկկողմ հանդիպումներ, բանակցություններ, նիստեր, խորհրդակցություններ և այլ միջոցառումներ՝ Կողմերի պատվիրակությունների և առանձին ներկայացուցիչների մասնակցությամբ:

Հոդված 11

Սույն Համաձայնագիրը ուժի մեջ է մտնում ուժի մեջ մտնելու համար անհրաժեշտ ներքին ընթացակարգերի կատարման մասին Կողմերի Երևանի վերջին ծանուցագրի ստացման օրվանից և կնքվում է հինգ (5) տարի ժամկետով: Սույն Համաձայնագրի գործողությունը ինքնաբերաբար երկարաձգվում է հաջորդական հնգամյա ժամկետներով, եթե Կողմերից որևէ մեկը համապատասխան ժամկետի ավարտից ոչ ուշ, քան վեց (6) ամիս առաջ գրավոր չի տեղեկացնում մյուս Կողմին դրա գործողությունը դադարեցնելու իր մտադրության մասին:

Կատարված է քաղաք Աշխաբադում 2014 թվականի ապրիլի 8-ին երկու բնօրինակով՝ յուրաքանչյուրը հայերեն, թուրքմեներեն և ռուսերեն լեզուներով, ընդ որում բոլոր տեքստերը հավասարազոր են:

Համաձայնագիրն ուժի մեջ է մտել 2014թ. հունիսի 3-ին