ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

ԱՆՀԱՏ ՁԵՌՆԱՐԿԱՏԵՐ ՄԽԻԹԱՐ ՍՏԵՓԱՆՅԱՆ ՓՈԽԱՆԱԿՄԱՆ ԿԵՏԻ ԱՐՏԱՐԺՈՒՅԹԻ ԱՌՈՒՎԱՃԱՌՔԻ ԹԻՎ 732 ԼԻՑԵՆԶԻԱՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Հայաստանի Հանրապետության կենտրոնական բանկի Ֆինանսական վերահսկողության վարչության կողմից 2010 թվականի դեկտեմբերի 16-ին հայտնաբերվել և 2010 թվականի դեկտեմբերի 24-ի թիվ 732/2 արձանագրությամբ արձանագրվել է Ա/Ձ Մխիթար Ստեփանյան փոխանակման կետի (լիցենզիա թիվ 732) (այսուհետ՝ նաև Փոխանակման կետ) կողմից թույլ տրված հետևյալ խախտումը.

Փոխանակման կետը 2000 ԱՄՆ դոլարի վաճառքի գործարքի վերաբերյալ անդորրագիր չի տրամադրել և գործարքը չի գրանցել էլեկտրոնային գրանցամատյանում։

Նշված փաստը հանգեցնում է Կենտրոնական բանկի խորհրդի 2007 թվականի մայիսի 15-ի թիվ 138-Ն որոշմամբ հաստատված «Արտարժույթի առուվաճառքի գործառնությունների լիցենզավորումը և կարգավորումը» կանոնակարգ 10-ի գլուխ 9-ի 75-րդ կետի պահանջների խախտմանը։

Ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ և 39.7-րդ հոդվածներով, հիմք ընդունելով «Արժութային կարգավորման և արժութային վերահսկողության մասին» Հայաստանի Հանրապետության օրենքի 10-րդ հոդվածի 6-րդ մասը, հաշվի առնելով Հայաստանի Հանրապետության կենտրոնական բանկի լիցենզավորման և վերահսկողության հանձնաժողովի եզրակացությունը (2011 թվականի հունվարի 26-ի թիվ 4 արձանագրություն)՝ Հայաստանի Հանրապետության կենտրոնական բանկի խորհուրդը որոշում է.

1. Սույն որոշմամբ նկարագրված խախտումը թույլ տալու համար ուժը կորցրած ճանաչել Ա/Ձ Մխիթար Ստեփանյան փոխանակման կետի արտարժույթի առուվաճառքի թիվ 732 լիցենզիան։

2. Սույն որոշումն ուժի մեջ է մտնում այն Փոխանակման կետ մուտքագրվելու կամ Փոխանակման կետի՝ սահմանված կարգով լիազորված անձին հանձնվելու օրվան հաջորդող օրը։

3. Սույն որոշումը կարող է բողոքարկվել ՀՀ վարչական դատարան՝ ՀՀ վարչական դատավարության օրենսգրքով սահմանված կարգով։